Дональд Трамп маъмурияти Ядро хавфсизлиги миллий бошқармасининг (ННСА) 300 дан 400 нафаргача ходимини ишдан бўшатди. Улар орасида ядро қуроли ишлаб чиқариш объектларида ишлаган, пудратчиларни назорат қилган ва қуролларни текширган мутахассислар бор, деб ёзмоқда Bloomberg ва CNN.
CNN маълумотларига кўра, ушбу қарор учун масъул бўлган амалдорлар ННСА АҚШ ядро арсеналини назорат қилиш учун масъул эканлигини билмаган бўлиши мумкин. Энергетика вазирлиги ҳозир ишдан бўшатилганларни қайтаришга ҳаракат қилмоқда. Вазирлик ва Bloomberg манбаларининг CNN билан рақамлари фарқ қилади, амалдорларнинг таъкидлашича, қисқартириш асосан маъмурий функцияларга эга бўлган “50 дан кам одамга” таъсир қилган.
Бундай мутахассислар ўта махфий маълумотларга кириш ҳуқуқига эга ва уларни ўқитиш 18 ойгача давом этади, деди ННСА собиқ раҳбари Жилл Хруби.
Унинг фикрича, уларнинг кўпчилиги энди давлат хизматига қайтмайди.
Миллий ядро хавфсизлиги бошқармаси (ННСА) 2000 йилда АҚШ Энергетика вазирлиги қошидаги ярим автоном агентлик сифатида ташкил этилган. Унинг расмий сайтидаги маълумотларга кўра, бошқарманинг асосий вазифаси “ядро физикасини ҳарбий қўллаш орқали миллий хавфсизликни мустаҳкамлаш”дир.
ННСА ишининг асосий йўналишлари орасида АҚШ ядровий арсеналининг ишончлилиги ва жанговар тайёргарлигини қўллаб-қувватлаш, оммавий қирғин қуроллари билан боғлиқ глобал хавфларни камайтириш, АҚШ ҳарбий-денгиз кучларини атом двигателлари билан таъминлаш, шунингдек, мамлакат ичида ва ташқарисида ядровий ва радиациявий фавқулодда вазиятларга жавоб бериш каби вазифалар мавжуд.
Қисқартиришлар Трампнинг федерал идоралардаги штатларни кенг миқёсда қисқартириш ва Илон Маскнинг “Давлат самарадорлиги департаменти” (DOGE) билан ҳамкорлик қилишни талаб қилувчи фармони билан боғлиқ. Маъмурият харажатларни қисқартириш учун 10 фоизгача давлат хизматчиларини ишдан бўшатишни режалаштирмоқда, бироқ бир қатор штатлар аллақачон бу қарорга қарши даъво аризаси киритган.
Ишдан бўшатиш тўлқини бутун мамлакат бўйлаб давом этмоқда, аввалроқ Associated Press юз минглаб одамлар ишсиз қолиши мумкинлиги, айниқса, бу 1-2 йилдан кам ишлаган ва синов муддатида бўлганларга тегишли экани ҳақида хабар берган эди.
Изоҳ (0)