Isroil harbiylari Livan janubidagi o‘z kuchlarini olib chiqishi kerak bo‘lgan Aytarun aholi punktida uylarni yoqib yuborib, o‘t ochishni to‘xtatish qoidalarini buzdi.
Livan ommaviy axborot vositalarining xabar berishicha, Isroil armiyasi Aytarunda joylashgan Xarika tumanidagi uylarga o‘t qo‘ygan.
Isroil qo‘shinlari aholi punktini tark etib, uni Livan armiyasi nazoratiga topshirishi kutilmoqda. Biroq, o‘n kundan beri Livan armiyasi Isroil harbiylari tomonidan to‘siqlar tufayli ushbu hududga kira olmaydi. Ayni paytda Isroil harbiy texnikasi bilan yopilgan yo‘lni ochish va xavfsizlikni ta’minlash ishlari olib borilmoqda.
Isroil qo‘shinlari to‘liq olib chiqib ketilmaguncha va vaziyat barqarorlashmaguncha, fuqarolarga Aytarunga qaytish taqiqlangan.
Isroil Livandan qo‘shinlarni olib chiqishni keyinga qoldirdi
Livandagi o‘t ochishni to‘xtatish to‘g‘risidagi kelishuvda Isroil armiyasining rejali ravishda chiqib ketishi 60 kun ichida yakunlanishi belgilangan edi. Ushbu band chiqib ketish jarayoni 60 kundan keyin ham davom etishi mumkinligini tushungan holda ishlab chiqilgan, deyiladi Isroil bosh vaziri Binyamin Netanyaxu kanselyariyasi xabarida.
Kanselyariyaning ta’kidlashicha, Isroil kuchlarini olib chiqish jarayoni Livan armiyasining mamlakat janubida joylashishi hamda “Hizbulloh” kuchlari va infratuzilmasini Litani daryosining shimoliga surib, kelishuvga to‘liq va samarali rioya etilishini ta’minlashi bilan bog‘liq.
Livan tomonidan o‘t ochishni to‘xtatish kelishuvi hali to‘liq bajarilmaganligi sababli, bosqichma-bosqich chiqish jarayoni Qo‘shma Shtatlar bilan to‘liq muvofiqlikda davom ettiriladi, deya aniqlik kiritdi bosh vazir idorasi.
Ta’kidlanishicha, Isroil mamlakat shimolida joylashgan aholi punktlari va fuqarolarini xavf ostiga qo‘ymaydi, “shimoldagi harbiy harakatlarning asosiy maqsadi esa aholini o‘z uylariga xavfsiz qaytarish to‘liq amalga oshirilishini qat’iy talab qiladi”.
2024-yil 27-noyabrga o‘tar kechasi Isroil va Livan o‘rtasida deyarli 14 oylik uzluksiz keskinlik ortishidan so‘ng Amerika tomonidan taklif etilgan kelishuv rejasiga muvofiq o‘t ochishni to‘xtatish tartibi kuchga kirdi. Bitimni tasdiqlashdan oldin Netanyaxu xalqqa murojaat qilib, shimoliy frontda o‘t ochishni to‘xtatish zarurligini tushuntirdi va “Hizbulloh” tomonidan sulh buzilgan taqdirda Isroil javob qaytarib, harbiy harakatlarni qayta boshlashini ta’kidladi.
AQSH tomonidan taklif qilingan kelishuv rejasiga ko‘ra, 60 kun ichida Livan armiyasi mamlakat janubidagi hududlarni egallashi, “Hizbulloh” kuchlari va infratuzilmasi esa Isroil chegarasidan 20-30 kilometr masofada joylashgan Litani daryosining shimoliy qismiga o‘tkazilishi kerak.
Joriy yil boshida Isroil “Hizbulloh” harakati bilan kelishilgan 60 kunlik o‘t ochishni to‘xtatish rejimini uzaytirishga urinayotgani haqida xabar berilgandi.
“60 kun muddati 26-yanvarda, ya’ni AQSHning saylangan prezidenti Donald Tramp o‘z lavozimiga kirishganidan olti kun o‘tgach tugasa-da, Bayden ma’muriyati vakillari muammolarni hal qilishga va keyingi ikki hafta davomida o‘t ochishni to‘xtatish rejimi buzilishining oldini olishga harakat qilmoqda”.
Livan Sog‘liqni saqlash vazirligi ma’lumotlariga ko‘ra, 26-yanvardan beri Isroil armiyasi hujumlari oqibatida 28 kishi halok bo‘lgan, 216 kishi jarohatlangan.
Izoh (0)