“Eron Qatardagi jahon chempionatiga hujum qilishi mumkin” — Isroil razvedkasi boshlig‘i

Isroil harbiy razvedkasi rahbari general-mayor Aaron Xaliva Eron Qatardagi jahon chempionatiga hujum uyushtirishni rejalashtirayotgani haqida ogohlantirdi. Bu haqda The Times of Israel xabar bermoqda.

Tel-Avivda Milliy xavfsizlik tadqiqotlari institutidagi konferensiyada chiqish qilib, Aaron Xaliva Eronni qamrab olgan norozilik namoyishlari “favqulodda o‘ziga xos holatlar” ekanini va “fuqarolar isyoni”ga aylanib ketganini aytdi.

“Halok bo‘lganlar soni, milliy ramzlarga hujumlar — bular rejimni juda xavotirga solyapti, ayniqsa, sanksiyalar xalqaro bosim va murakkab iqtisodiy vaziyatni ham hisobga olganda”, — dedi u.

Xalivaning so‘zlariga ko‘ra, Eronga bosim kuchayib borishi bilan, shu jumladan, ichki bosim, Eronning javobi mintaqada ham, dunyoda ham yanada tajovuzkorroq bo‘lib bormoqda.

“Men sizga aytay, eronliklar hozir jahon chempionatiga hujum qilish imkoniyatini ham ko‘rib chiqmoqda. Ularni ushlab turgan yagona narsa — Qatarning bunga javoban munosabati”, — deya ogohlantirdi harbiy.

Eron Islom inqilobi qo‘riqchilari korpusi 21-noyabr kuni Iroq Kurdistonidagi “dissident guruhlar” shtab-kvartirasini dron va raketalardan o‘qqa tutgan edi. Ma’lum qilinishicha, qisman vayron bo‘lgan obyektlarni yo‘q qilish uchun Iroqning Kurd muxtoriyatidagi harbiy bazalari nishonga olingan. Eron Iroqda joylashgan kurd jangarilarini mamlakatda tartibsizliklarni qo‘zg‘atganlikda ayblagan. AQSh Markaziy qo‘mondonligi Tehronning mazkur hujumini qoralagan.

Eronda namoyishlar sentabr o‘rtalarida, 22 yoshli Mahsa Aminiyning o‘limidan keyin boshlangan. Politsiya uni Tehronda metrodan chiqish chog‘ida hijobni noto‘g‘ri o‘ragani uchun hibsga olgandi. Mamlakatdagi tartibsizliklar ortidan olti kishi o‘limga hukm qilingan. Mahsa Aminiyni qo‘llab-quvvatlash maqsadida Eronda hijoblarini yechib tashlagan ikki mashhur aktrisa esa hibsga olingan. Tehron rasmiylari norozilik namoyishlarini “tartibsizliklar” deb ta’riflaydi va mamlakatning G‘arb dushmanlarini ularni gijgijlashda ayblaydi.

Qatar mezbonligidagi 2022-yilgi Jahon Chempionati 20-noyabr, yakshanba kuni boshlandi. JCH—2022 musobaqasi Qatardagi 8 ta stadionda bo‘lib o‘tmoqda.

Mavzuga doir:

• Eronda namoyishlar ortidan oltinchi odam o‘limga hukm qilindi
• Eron Saudiya Arabistonini Tehronning “sabrini sinamaslikka” chaqirdi
• Eron o‘zining birinchi gipertovushli ballistik raketasini ishlab chiqdi