Qirg‘iziston prezidenti Sadir Japarov Qatardagi jahon chempionatiga biznes-jetda parvoz qilgani uchun tanqidga uchradi. Prezident matbuot kotibi Erbol Sultanbayev tanqidlarga javob berib, vaziyatga oydinlik kiritdi, deb yozadi “24.kg”.
Sadir Japarov futbol bo‘yicha jahon chempionatining final bahsi uchun Qatarga xususiy samolyotda uchib ketgan, prezident matbuot xizmati esa ushbu safarni “ishchi tashrif” deb atagandi. Qirg‘iziston OAVlari ma’lumotlariga ko‘ra, Bishkekdan Dohaga uchish va qaytib kelish 50—60 ming dollarga tushgan bo‘lishi mumkin.
Tanqidlarga munosabat bildirar ekan, prezident matbuot kotibi Facebook’dagi sahifasida bugungi kunda xususiy bortni lizingga olish jarayoni tugallanayotganini ma’lum qildi. Bu Bombardier Challenger yoki Embraer Legacy bo‘ladi, deya qo‘shib qo‘ydi u.
“Qirg‘iziston tomoni xorijiy mamlakatlarga tashriflar uchun ixcham, kichik delegatsiyalarga mo‘ljallangan ushbu samolyotni sotib olishga qaror qildi. Bungacha u orqali barcha parvozlar unga egalik qiluvchi kompaniya bilan kelishuv asosida bepul amalga oshirildi. Qirg‘iziston tomoni faqat aviatsiya yonilg‘isi uchun xarajatlarni o‘z zimmasiga oldi, shu jumladan, prezident Japarovning Qatar davlatiga bugungi ishchi tashrifi ham shunday tarzda amalga oshirildi”, — deb yozdi prezident administratsiyasi rasmiy vakili.
Avvalroq Qirg‘iziston prezidenti matbuot xizmati Sadir Japarov ishchi tashrif bilan Dohaga uchib ketgani haqida xabar bergan edi.
Qatar OAVlari esa u futbol bo‘yicha jahon chempionatiga kelib, Fransiya va Argentina o‘rtasidagi final bahsni tomosha qilgani haqida xabar berdi.
Bundan avval Sadir Japarov Germaniyadan davlat budjetiga sotib olingan Airbus H145 vertolyotini sinovdan o‘tkazish jarayonida kiygan kurtkasi muhokamalarga sabab bo‘lgandi.
Izoh (0)