Eronda ayol “kiyinish qoidalariga qarshi norozilik” sifatida yalang‘och holda politsiya mashinasiga chiqdi. Bu haqda Son Dakika xabar berdi.
Voqea Eronning aholi soni bo‘yicha ikkinchi o‘rindagi shahri Mashhadda sodir bo‘lgan. Tasvirlarda ayolning patrul mashinasi kapotiga chiqib, ofitserlarga baqirgani va qo‘llarini ko‘tarib old oynada o‘tirgani ko‘rinadi. Ofitserlarning uni tushirishga urinishlariga qaramay, ayol joyidan qimirlamagan.
Mahalliy ommaviy axborot vositalariga ko‘ra, ayol allaqachon hibsga olingan. Unga nisbatan ayblov e’lon qilinishi yoki qilinmasligi haqida rasmiy berilmagan.
Bu Eronda ayolning yarim yalang‘och holda norozilik bildirgan birinchi holat emas. Jumladan, 2024-yil Tehrondagi Azod islom universiteti talabasi hijobni noto‘g‘ri o‘ragani uchun ta’qibga uchragach, kiyimlarini yechib, universitet hududida yurgandi. Shundan so‘ng politsiya xodimlari uni olib ketgandi.
Eronlik talaba Axu Daryaiy ruhiy kasalliklar shifoxonasiga majburiy davolanishga yuborilgan. Mustaqil manbalardan olingan ma’lumotlarga ko‘ra, ilgari talabaning ruhiyatida hech qanday muammo kuzatilmagan. Shunga qaramay, qiz kuchli ta’sir qiluvchi dorilar bilan davolanayotgani aytilmoqda.
Eronda ayollar sochlarini ro‘mol ostiga yashirib, keng kiyim kiyishlari shart. Aprel oyidan boshlab Eron ko‘chalarida hijobni to‘g‘ri kiyishni nazorat qiluvchi “Basij” xodimlari soni sezilarli darajada oshgan. Universitetlar esa tashqi ko‘rinishi qoidalarga mos kelmaydigan talaba qizlarni darsga kiritmaslik uchun yuzni tanish texnologiyasidan foydalanmoqda.
Eronning yangi prezidenti Mas’ud Pezeshkiyon majburiy hijobni qo‘llab-quvvatlamaydi, ammo bu masalada — Eron oliy rahnamosi Oyatulloh Ali Xomanaiy kabi vakolatlarga ega emas.
Izoh (0)