Эрон ҳукумати 12 февраль куни Теҳрондаги ўқув муассасалари, давлат идоралари ва банкларни ёпиқ қолдиришга қарор қилди.
11 февраль куни Эрон пойтахтининг ғарбий ва шарқий ҳудудларида бир неча соат давомида электр таъминоти тўхтатилди. Бунга электр станциялари учун ёқилғи танқислиги сабаб қилиб кўрсатилмоқда. Интернет ва телефон алоқасида ҳам узилишлар юз берди.
Келгуси ҳафта давомида кузатиладиган ҳароратнинг кескин пасайиши, қор ёғиши ва совуқ об-ҳаво, шунингдек, саноат, тижорат ва маиший газ истеъмолининг кўпайишини ҳисобга олган ҳолда, истеъмолчилар электр энергияси ва газ сарфини 10 фоизга камайтиришлари лозим, дейди электр компанияси раҳбари Мустафо Ражабий Машҳадий.
Табиий газ танқислиги жиддий тус олган шароитда, президент Масъуд Пезешкиён маъмурияти Арак, Исфахон ва Караж каби шаҳарлардаги йирик электр станцияларида юқори олтингугуртли мазутнинг кенг қўлланилишига йўл қўймасликни устувор вазифа қилиб белгилади.
Ноябрь ойидан бошлаб Теҳрондаги ва бошқа вилоятлардаги электр энергиясини тақсимлаш компаниялари ёқилғини тежаш ҳамда мазутга қарамликни камайтириш мақсадида ҳукумат стратегияси сифатида турар-жой ва тижорат ҳудудларида навбатли электр узилишларини эълон қилмоқда.
Бундан олдинги кенг кўламли электр узилиши тахминан бир ой аввал юз берган эди. Ўшанда “блекаут” нафақат Теҳронга, балки Қум шаҳрига, Эроннинг ғарбий қисмига ва Каспий денгизи соҳилига ҳам таъсир қилган. Узилишлар Исроилнинг киберҳужумлари ва Исроил армияси ҳарбий-ҳаво кучларининг Эроннинг муҳим инфратузилмасига берган зарбалари билан боғлиқ бўлиши мумкинлиги айтилган эди.
- Эроннинг тасдиқланган нефть захиралари 155 миллиард баррелни ташкил этади.
- Табиий газ бўйича мамлакат дунёдаги энг йирик захираларга эга бўлиб, умумий ҳажми 33,5 триллион куб метрга тенг. Бу эса дунёдаги умумий газ захираларининг тахминан 17 фоизини ташкил этади.
Изоҳ (0)