Birlashgan Arab Amirliklari (BAA) vositachiligida Rossiya va Ukraina 5-fevral kuni “150 ga 150” formatida asirlar almashdi. Bu haqda Ukraina prezidenti Vladimir Zelenskiy xabar berdi.
“Bugun hammamiz uchun yaxshi kun. Rossiya asirligidan 150 nafar himoyachimizni qaytaryapmiz. Bular askarlar, serjantlar va zobitlardir. Mariupol va Zaporijjya viloyatlarida asirga tushgan harbiy-dengiz kuchlari, havo kuchlari, desant-hujum va quruqlikdagi qo‘shinlar askarlari, milliy gvardiyachilar, chegarachilar, mudofaa kuchlari, shuningdek, politsiyachi”, deb yozdi Zelenskiy o‘zining Telegram kanalida.
Rossiya Mudofaa vazirligi ham yil boshida Ukraina bilan eng yirik asirlar almashinuvi bo‘lganini tasdiqladi. Hozirgi vaqtda rossiyalik harbiylar Belarus hududida ekani ma’lum qilindi.
Kiyev va Moskva o‘rtasidagi oldingi asirlar almashinuvi 15-yanvar kuni “25 ga 25” formulasi bo‘yicha amalga oshirilgan edi. Bu jarayonda BAA ham vositachilik qildi.
Zelenskiy: Urushda 45 ming ukrainalik harbiy halok bo‘ldi
Ukraina prezidenti 4-fevral kuni britaniyalik jurnalist Pirs Morganga bergan intervyusida Rossiyaga qarshi urushda 45100 ga yaqin ukrainalik harbiy halok bo‘lganini ma’lum qildi. Bundan tashqari, Ukraina himoyachilarining 390 mingga yaqini yaralangani qayd etilgan. Zelenskiyning tushuntirishicha, jarohatlanganlar soni yarador bo‘lganlar sonidan ko‘proq, chunki “yaralangan, keyin esa jang maydoniga qaytib, yana jarohat olgan odamlar bor”.
Uning so‘zlariga ko‘ra, Rossiyaning Ukrainaga keng ko‘lamli bosqini davomida 350 mingga yaqin rossiyalik halok bo‘lgan, yana 600-700 ming kishi yaralangan.
Zelenskiy 2024-yil 12-dekabr kuni Shimoliy Koreya rahbari Kim Chen Inga Kursk viloyatida asirga olingan KXDR askarlarini Rossiyadagi ukrainalik harbiylarga almashtirishni taklif etgandi. Pxenyan Zelenskiyning taklifiga hamon javob bermagan.
Izoh (0)