Turkmaniston havo yo‘llari Ashxobod va Moskva o‘rtasidagi reyslarni 2025-yil yanvar oyi oxirigacha to‘xtatganini ma’lum qildi.
Turkmaniston havo yo‘llari 2024-yil 30-dekabrdan 2025-yil 31-yanvarga qadar Ashxobod—Moskva—Ashxobod yo‘nalishi bo‘yicha muntazam reyslar bekor qilinganini maʼlum qiladi. To‘lovni to‘liq qaytarib olishingiz mumkinligini maʼlum qilamiz, deyiladi aviakompaniya saytida.
Parvozni bekor qilish sabablari haqida ma’lumot berilmagan.
25-dekabr kuni Qozog‘istonning Oqtov shahri yaqinida sodir bo‘lgan Ozarbayjon havo yo‘llari (AZAL)ga qarashli Embraer 190 yo‘lovchi samolyoti halokatini tergov qilish munosabati bilan bir qancha xorijiy aviakompaniyalar Rossiyaga parvozlarni to‘xtatgan edi. Ular orasida AZALning o‘zi (Bokudan Rossiyaning 10 ta shahriga), shuningdek, Qozog‘istonning Qazaq Air (Ostonadan Yekaterinburgga), Isroilning El Al (Tel-Avivdan Moskvaga) va Arab Flydubai (Dubaydan Sochi va Minvodiga parvozlar bekor qilingan) bor.
Bokudan Grozniyga uchayotgan Embraer 190 samolyoti bortida 67 kishi, jumladan besh nafar ekipaj aʼzosi bo‘lgan. Samolyot Grozniyga qo‘nishga bir necha urinishlardan so‘ng Oqtovga yo‘l olgan. U mahalliy aeroportdan 3 km uzoqlikda qulagan. So‘nggi maʼlumotlarga ko‘ra, 38 kishi halok bo‘lgan.
Ozarbayjon raqamli rivojlanish va transport vaziri Rashad Nabiyevning aniqlik kiritishicha, samolyot vayronalari va guvohlarning so‘zlari “tashqi aralashuv” bo‘lganini ko‘rsatmoqda.
Rosaviatsiya rahbari Dmitriy Yadrov falokat yuz bergan kuni Grozniy aeroporti hududidagi vaziyat “juda og‘ir” bo‘lganini ma’lum qildi. Uning so‘zlariga ko‘ra, Ukraina dronlari Grozniy va Vladikavkaz shaharlarining “fuqarolik infratuzilmasiga terroristik hujumlar uyushtirgan”, shu munosabat bilan “barcha samolyotlarning belgilangan hududdan zudlik bilan chiqib ketishini” nazarda tutuvchi rejim joriy qilingan.
Yadrov shuningdek, Checheniston poytaxti aeroporti hududida tuman tufayli noqulay ob-havo bo‘lganini qayd etgan.
Izoh (0)