Davlat xavfsizlik xizmati xodimlari tomonidan o‘tkazilgan tezkor tadbirlarda Tojikiston va Afg‘onistondan kontrabanda yo‘li bilan olib kelingan 78 kilo giyohvandlik vositasi musodara qilindi.
Ma’lum qilinishicha, Tojikistonning Panjikent tumani bilan chegaradosh bo‘lgan Samarqand viloyatining Urgut tumanida giyohvandlik vositalari kontrabandasi bilan shug‘ullanuvchi 1 nafar Tojikiston va 6 nafar O‘zbekiston fuqarolaridan iborat jinoiy guruh faoliyatiga chek qo‘yildi.
Tezkor tadbir davomida guruh aʼzolaridan qo‘shni davlatdan aylanma yo‘llar orqali olib kelingan 11 kilogramm 502 gramm opiy moddasi protsessual tartibda rasmiylashtirib olindi. Shuningdek, ulardan 2600 dollar, 12 million 690 ming so‘m va 850 somoni ham ashyoviy dalil sifatida hujjatlashtirib olindi.
Aniqlanishicha, ular Tojikistondan keltirilgan ushbu narkotikni O‘zbekistonda sotishni rejalashtirishgan.
Toshkent viloyatining Yangiyo‘l tumanida 1985-yilda tug‘ilgan Qozog‘iston fuqarosi to‘xtatilib, uning yuk sumkasi ko‘zdan kechirilganda, sumka ichida 46 kilogramm 738 gramm gashish moddasi borligi aniqlanib, protsessual tartibda rasmiylashtirib olindi.
Shuningdek, tezkor tadbir davom ettirilib, uning jinoiy sherigi bo‘lgan, 1976-yilda tug‘ilgan Tojikiston fuqarosi hamda haydovchilik faoliyati bilan shug‘ullanuvchi, 1964-yilda tug‘ilgan O‘zbekiston fuqarosi ham ushlandi. Aniqlanishicha, mazkur giyohvandlik vositasi Afg‘onistondan kontrabanda yo‘li bilan olib kelingan.
Toshkent—Farg‘ona yo‘nalishida harakatlanayotgan Gentra Pop tumani hududida joylashgan YPX maskanida to‘xtatilib, ko‘zdan kechirilganda, Marg‘ilon shahrida yashovchi, 1996 va 2001-yillarda tug‘ilgan aka-uka ketayotgan avtomashina salonida 19 kilogramm 885 gramm gashish moddasi borligi maʼlum bo‘ldi.
Shuningdek, aka-ukaning jinoiy sherigi bo‘lgan va boshqa avtomashinada ularni kuzatib borayotgan, Marg‘ilon shahrida yashovchi, 1998-yilda tug‘ilgan shaxs ham qo‘lga olindi.
Tergovga qadar tekshiruv davomida ular muqaddam tojikistonlik narkokuryerlar tomonidan Toshkent viloyatining Ohangaron tumani hududidagi xufiya joyga qoldirib ketilgan narkotik moddalarni olib ketayotgani maʼlum bo‘ldi.
Hozirda uchala holat yuzasidan mazkur shaxslarga nisbatan Jinoyat kodeksining 246 va 273-moddalari bilan jinoyat ishlari qo‘zg‘atilib, qamoq ehtiyot chorasi qo‘llanilgan. Tergov harakatlari olib borilmoqda.
Izoh (0)