Farg‘ona, Xorazm, viloyatlari va Toshkent shahrida giyohvand modda va kuchli ta’sir qiluvchi dori vositalari noqonuniy aylanmasi oldi olindi.
Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan bojxona organlari bilan hamkorlikda o‘tkazilgan tezkor tadbirda Toshkent—Farg‘ona yo‘nalishida harakatlanayotgan, Marg‘ilon shahrida yashovchi, 1992-yilda tug‘ilgan shaxs boshqaruvidagi Damas “Namangan” YPX maskanida to‘xtatilib, ko‘zdan kechirilganda avtomobil orqa o‘rindig‘iga yashirib qo‘yilgan 9 kilogramm 573 gramm gashish moddasi borligi aniqlanib, tegishli tartibda rasmiylashtirib olingan.
Shuningdek, tergovga qadar tekshiruv harakatlari davomida, mazkur shaxsning yashash xonadonidan ham 2 kilogramm 779 gramm gashish va 1 kilogramm 29 gramm opiy moddalari hujjatlashtirib olingan.
Tezkor tadbir davomida ushbu fuqaroning Farg‘ona va Marg‘ilon shaharlarida istiqomat qiluvchi, 1987, 1989 va 2003-yillarda tug‘ilgan sheriklari ham qo‘lga olindi.
Ulardan biri muqaddam giyohvandlik vositalari savdosi bilan bog‘liq jinoyati uchun sudlangan bo‘lsa-da, o‘z xatosidan to‘g‘ri xulosa chiqarmagan.
Davlat xavfsizlik xizmatining Xorazm viloyati bo‘yicha boshqarmasi xodimlari tomonidan bojxona va ichki ishlar organlari bilan hamkorlikda Tuproqqalʼa tumanida o‘tkazilgan tezkor tadbirda Samarqand—Xorazm yo‘nalishida harakatlanayotgan, Samarqand shahrida yashovchi, 1992-yilda tug‘ilgan fuqaro boshqaruvidagi Kia rusumli avtotransport vositasi to‘xtatilib, ko‘zdan kechirilganda avtomashinada 2 kilogramm 821 gramm opiy moddasi borligi aniqlanib, protsessual tartibda rasmiylashtirilgan.
Aniqlanishicha, u Tojikistonda yashovchi fuqarodan har bir kilogrammini 6500 dollardan sotib olgan ushbu narkotik moddani Xorazm viloyatidagi giyohvandfurushlarga sotishni rejalashtirgan.
Davlat xavfsizlik xizmati va ichki ishlar organlari xodimlari hamkorligida o‘tkazilgan tezkor tadbirda, Toshkent shahrining Yashnobod tumanida istiqomat qiluvchi, 1990-yilda tug‘ilgan fuqaroning yashash xonadoni xolislar ishtirokida ko‘zdan kechirilgan.
Unda kir yuvish vositalari paketlariga qadoqlangan 45 kilogramm 898 gramm kristall kukunsimon moddalar mavjud bo‘lib, ularning tarkibida “Pregabalin” kuchli taʼsir qiluvchi moddasi borligi aniqlandi. Shuningdek, faol tadbir davomida 1 kilogramm190 gramm “Tropikamid” moddasi ham musodara qilindi.
Toshkent shahrining Mirobod tumanida o‘tkazilgan tezkor tadbirda esa Farg‘ona viloyatining Dang‘ara tumanida yashovchi, 1986-yilda tug‘ilgan, muqaddam bir necha marotaba sudlangan shaxs 1512 dona “Regapen” va 300 dona “Tropikamid” kuchli taʼsir qiluvchi dori vositalarini Toshkent shahrida istiqomat qiluvchi, 1991-yilda tug‘ilgan, muqaddam bir necha marotaba sudlangan fuqaroga 60 million so‘mga sotgan vaqtida ushlandi.
Maʼlum bo‘lishicha, ushbu dori vositalari Qirg‘izistondan olib kelingan.
Hozirda mazkur shaxslarning barchasiga nisbatan jinoyat ishlari qo‘zg‘atilib, qamoq ehtiyot chorasi qo‘llanilgan.
Izoh (0)