Davlat xavfsizlik xizmati xodimlari tomonidan Surxondaryo va Farg‘ona viloyatlarida Tojikistondan olib kelingan jami 25,8 kilogramm gashish giyohvandlik vositasi musodara qilindi.
Qayd etilishicha, DXX Surxondaryo viloyati bo‘yicha boshqarmasi xodimlari tomonidan viloyat IIB bilan hamkorlikda tezkor tadbir o‘tkazilgan. Tadbirda tojikistonlik narkosavdogar aylanma yo‘llar orqali yuborgan 11 kilogramm 942 gramm gashish moddasini qabul qilib olib, Sho‘rchi tumanidagi to‘yxona yaqinida joylashgan simyog‘och ostiga yashirib ketmoqchi bo‘lgan vaqtida, o‘zaro qarindosh hisoblangan 25 yoshli ikki nafar mahalliy fuqaro qo‘lga olingan.
Shuningdek, ular ajal og‘usini belgilangan joyga qoldirib ketganlaridan so‘ng, uni boshqa shaxs olib ketishi kerakligi aniqlanib, tezkor tadbir davom ettirilgan va giyohvandlik vositasini xufya joydan olish uchun kelgan Uzun tumanida yashovchi 37 yoshli fuqaro ham ushlangan.
Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan o‘tkazilgan tezkor tadbirda esa Qo‘qon—Farg‘ona yo‘nalishida harakatlanayotgan Tracker rusumli avtotransport vositasi Bog‘dod tumanida to‘xtatilib, ko‘zdan kechirilganda, unda Farg‘ona shahrida yashovchi, 1974 va 1988-yillarda tug‘ilgan uch nafar shaxs 11 kilogramm 966 gramm gashish moddasini olib ketayotgani aniqlanib, protsesssual tartibda rasmiylashtirib olingan.
Shuningdek, ularni boshqa avtomashinada kuzatib borayotgan va giyohvandlik vositasining haqiqiy egasi bo‘lgan, Farg‘ona shahrida yashovchi 1990 va 1993-yillarda tug‘ilgan er-xotin ham qo‘lga olingan. Ta’kidlanishicha, mazkur er-xotin muqaddam giyohvandlik vositalari savdosi bilan bog‘liq jinoyatlari uchun sudlangan.
Tergovga qadar tekshiruv davomida, ular Tojikistondan kontrabanda yo‘li bilan olib kelingan giyohvandlik moddasini Qo‘qon shahrida yashovchi 38 yoshli ayoldan sotib olgani aniqlanib, u ham protsessual tartibda ushlangan.
Boshqa holatda esa Qo‘qon—Marg‘ilon yo‘nalishida harakatlanayotgan Nexia rusumli avtotransport vositasi Qo‘shtepa tumani hududida to‘xtatilib, ko‘zdan kechirilganda, unda yo‘lovchi sifatida ketayotgan Qo‘qon shahrida yashovchi 27 yoshli ayolga tegishli 1 kilogramm 941 gramm gashish moddasi borligi aniqlanib, protsessual tartibda rasmiylashtirib olingan.
Tojikistondan keltirilgan mazkur giyohvandlik vositasi ham yuqoridagi holatda ko‘rsatilgan, yaʼni Qo‘qon shahrida yashovchi 38 yoshli ayolga tegishli bo‘lib, uni Marg‘ilon shahriga sotish uchun olib ketayotgan bo‘lgan.
Hozirda mazkur shaxslarga nisbatan jinoyat ishlari qo‘zg‘atilib, qamoq ehtiyot chorasi qo‘llangan.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, Qirg‘izistonda O‘zbekistonga giyohvand moddalar tashish bilan shug‘ullangan shaxs qo‘lga olingan edi.
Izoh (0)