Surxondaryo viloyatidagi “Ayritom” chegara bojxona postida yuk mashina kabinasiga berkitilgan giyohvandlik vositalari fosh bo‘ldi. Bu haqda viloyati bojxona boshqarmasi xabar berdi.
.jpg)
Qayd etilishicha, 3-iyul kuni soat 22:40 larda Surxondaryo viloyati bojxona boshqarmasi va DXX Surxondaryo viloyati bo‘yicha boshqarmasi xodimlari hamda Chegara qo‘shinlari harbiy xizmatchilari tomonidan o‘zaro hamkorlikda “Ayritom” chegara bojxona postining kirish avtopavilyoniga kirib kelgan yuk avtotransport vositasi belgilangan tartibda bojxona nazoratidan o‘tkazilgan.
Natijada avtotransport vositasi kabinasidagi xufya joyga berkitilgan 7 ta sariq rangli skotch bilan o‘ralgan o‘ramlar borligi maʼlum bo‘lgan. Shundan so‘ng, ushbu o‘ramlar ochilib, maxsus elektron tarozida o‘lchab ko‘rilganda uchta o‘ramda jami og‘irligi 3 kilogramm bo‘lgan opiy va to‘rtta o‘ramda og‘irligi 4 kilogramm 950 gramm bo‘lgan gashish giyohvandlik vositalari borligi aniqlangan.
Hozirda aniqlangan holat yuzasidan tergovga qadar tekshiruv harakatlari olib borilmoqda.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, Qirg‘izistonda O‘zbekistonga giyohvand moddalar tashish bilan shug‘ullangan shaxs qo‘lga olingan edi.
Izoh (0)