DXX O‘zbekistonga Afg‘oniston, Tojikiston va Qirg‘izistondan keltirilgan 47 kilodan ortiq narkotik moddalar musodara qilinganini ma’lum qildi.
Surxondaryo viloyatining Uzun tumanida yashovchi, 1971, 1974, 1985-yillarda tug‘ilgan uch nafar fuqaro Tojikistondan 10 kilogramm 50 gramm opiy va 10 kilogramm 29 gramm gashish moddalarini kontrabanda yo‘li bilan olib o‘tgan vaqtlarida DXX Chegara qo‘shinlari harbiy xizmatchilari tomonidan qo‘lga olingan.
DXX Surxondaryo viloyati bo‘yicha boshqarmasi hamda viloyat IIB xodimlari hamkorligida o‘tkazilgan tezkor tadbirda narkokuryerlar tomonidan Afg‘onistondan olib kelinib, Muzrabot tumani hududidagi xufiya joyga qoldirib ketilgan 1 kilogramm 953 gramm opiy va 4 kilogramm 116 gramm gashish moddalarini qabul qilib olgan vaqtida Termiz shahrida yashovchi, 1981-yilda tug‘ilgan, muqaddam giyohvandlik vositalari savdosi bilan bog‘liq jinoyati uchun sudlangan shaxs ushlangan.
Shuningdek, tezkor tadbir davom ettirilib, ushbu narkotik moddalarni Termiz shahrida qabul qilib olgan vaqtida 1976-yilda tug‘ilgan Qozog‘iston fuqarosi ham qo‘lga tushgan.
Termiz tumanida o‘tkazilgan tezkor tadbirda muqaddam narkokuryerlar tomonidan xufiya joyga qoldirib ketilgan 922 gramm opiy va 4 kilogramm 203 gramm gashish moddalarini olib, doimiy yashash manziliga ketmoqchi bo‘lgan vaqtida Samarqand shahrida istiqomat qiluvchi, 1977-yilda tug‘ilgan fuqaro ushlangan.
Mazkur shaxs narkotik moddalarning har bir kilogrammini afg‘onistonlik narkosavdogarlardan 2300 dollardan sotib olgan.
Sariosiyo tumanida qayd etilgan holatda Denov tumanida yashovchi, 1968-yilda tug‘ilgan, muqaddam giyohvandlik vositalari savdosi bilan bog‘liq jinoyati uchun sudlangan fuqaro to‘xtatilib tekshirilganda, uning yonida 4 kilogramm 80 gramm gashish moddasi borligi aniqlanib, protsessual tartibda rasmiylashtirib olingan. Ma’lum bo‘lishicha, ushbu giyohvandlik vositasi Tojikistondan aylanma yo‘llar orqali olib kelingan.
Bu yo‘nalishda DXX Farg‘ona viloyati bo‘yicha boshqarmasi xodimlari ham tezkor tadbirlar o‘tkazishdi. Xususan, Qo‘qon shahrida yashovchi, 1979-yilda tug‘ilgan shaxs boshqaruvidagi Gentra to‘xtatilib tekshirilganda uning salonida 975 gramm opiy borligi aniqlanib, tegishli tartibda hujjatlashtirib olingan.
Shuningdek, tezkor tadbir davom ettirilib, uning yashash xonadonidan ham 789 gramm opiy hamda 5 kilogramm 239 gramm gashish moddalari olingan.
Aniqlanishicha, mazkur fuqaro tojikistonlik narkosavdogarlar tomonidan yuborilgan ushbu zahri qotilni Qo‘qon shahrida sotishni rejalashtirgan.
Boshqa holatda esa muqaddam qirg‘izistonlik narkokuryerlar tomonidan Quvasoy shahri hududidagi xufiya joyga qoldirib ketilgan 4 kilogramm 922 gramm gashish moddasini olib, doimiy yashash manziliga ketayotgan vaqtida Farg‘ona shahrida istiqomat qiluvchi, 1998-yilda tug‘ilgan fuqaro ushlangan.
Hozirda mazkur shaxslarga nisbatan jinoyat ishlari qo‘zg‘atilib, qamoq ehtiyot chorasi qo‘llanilgan.
Izoh (0)