Farg‘ona viloyatida huquq-tartibot idoralari hamkorligida xalqaro miqyosda juda katta miqdorda pul mablag‘larini firibgarlik yo‘li bilan qo‘lga kiritib kelayotgan jinoiy guruh faoliyati fosh etildi. Bu haqda “Axborot 24” dasturida xabar berildi.
Maʼlum qilinishicha, 1986-yilda tug‘ilgan farg‘onalik shaxs Rossiya fuqarolaridan noqonuniy pul o‘zlashtirish bilan shug‘ullanuvchi jinoiy tuzilma tuzgan.
Jinoiy tuzilma 32 kishidan iborat bo‘lgan. Ular Farg‘onada ikkita va Toshkentda bitta Call-markaz ko‘rinishida faoliyat yuritgan.
Internetda biologik faol qo‘shimchalar sotib olgan Rossiya fuqarolarining shaxsiy maʼlumotlaridan foydalangan holda, Call-markaz “operatorlari” o‘zlarini tergov organlari xodimlari sifatida tanishtirgan.
Ular BAD sotuvchilari tomonidan yetkazilgan taxminiy maʼnaviy zararni qoplash uchun to‘lov taklif qilgan. Ularning baʼzilari Rossiya Moliya vazirligi vakillari nomidan ish olib borgan va daromad solig‘ini to‘laganidan keyin pul kompensatsiyasini vaʼda qilgan.
Mablag‘ni o‘tkazish uchun esa ular o‘zlari aytgan bank kartasi rekvizitlariga zarur miqdorda to‘lov yuborishni talab qilgan. 32 kishining barchasi hibsga olingan.
Mazkur holat yuzasidan gumonlanuvchilarga nisbatan Jinoyat kodeksining 168-moddasi 3-qismi (bir guruh shaxslar tomonidan sodir etilgan firibgarlik) va 278−2-moddasi (kompyuter axborotidan qonunga xilof ravishda (ruxsatsiz) foydalanish) bilan jinoyat ishi qo‘zg‘atilgan.
Izoh (0)