Фарғона вилоятида ҳуқуқ-тартибот идоралари ҳамкорлигида халқаро миқёсда жуда катта миқдорда пул маблағларини фирибгарлик йўли билан қўлга киритиб келаётган жиноий гуруҳ фаолияти фош этилди. Бу ҳақда “Ахборот 24” дастурида хабар берилди.
Маълум қилинишича, 1986 йилда туғилган фарғоналик шахс Россия фуқароларидан ноқонуний пул ўзлаштириш билан шуғулланувчи жиноий тузилма тузган.
Жиноий тузилма 32 кишидан иборат бўлган. Улар Фарғонада иккита ва Тошкентда битта Call-марказ кўринишида фаолият юритган.
Интернетда биологик фаол қўшимчалар сотиб олган Россия фуқароларининг шахсий маълумотларидан фойдаланган ҳолда, Call-марказ “операторлари” ўзларини тергов органлари ходимлари сифатида таништирган.
Улар БАД сотувчилари томонидан етказилган тахминий маънавий зарарни қоплаш учун тўлов таклиф қилган. Уларнинг баъзилари Россия Молия вазирлиги вакиллари номидан иш олиб борган ва даромад солиғини тўлаганидан кейин пул компенсациясини ваъда қилган.
Маблағни ўтказиш учун эса улар ўзлари айтган банк картаси реквизитларига зарур миқдорда тўлов юборишни талаб қилган. 32 кишининг барчаси ҳибсга олинган.
Мазкур ҳолат юзасидан гумонланувчиларга нисбатан Жиноят кодексининг 168-моддаси 3-қисми (бир гуруҳ шахслар томонидан содир этилган фирибгарлик) ва 278−2-моддаси (компьютер ахборотидан қонунга хилоф равишда (рухсатсиз) фойдаланиш) билан жиноят иши қўзғатилган.
Изоҳ (0)