Toshkentda firibgarlik va pora berish jinoyatlarida ayblanib, advokat va yurist ushlandi.
Ma’lum qilinishicha, Toshkent shahridagi advokatlik firmasi advokati 1999-yilda tug‘ilgan shaxsga nisbatan 2024-yilda jinoyat ishlari bo‘yicha Yashnobod tuman sudining hukmi bilan tayinlangan 10 yil muddatga ozodlikdan mahrum qilish jazosi bo‘yicha hozirda shahar sudining kassatsiya instansiyasida ko‘rilayotgan shikoyatni mansabdor tanishlari orqali ijobiy hal qilib berishni va’da qilgan.
Xususan, u tayinlangan jazoni 4 yilga kamaytirib berish evaziga, har bir yil uchun 5 ming dollardan, jami 20 ming AQSH dollari olgan vaqtida huquqni muhofaza qiluvchi idoralar tomonidan ashyoviy dalillar bilan ushlandi.
Shuningdek, tezkor tadbir davom ettirilib, mazkur ishga aloqador bo‘lgan, Toshkent shahridagi banklardan birining yuristi ham advokatdan 15 ming AQSH dollari olgan vaqtida ushlangan.
Tergovga qadar tekshiruv davomida bank yuristi prokuratura organlaridagi qarindoshi orqali yordam bermoqchi bo‘lgani aniqlanib, hozirda bu borada tegishli chora-tadbirlar amalga oshirilmoqda.
Holat yuzasidan advokat hamda yuristga nisbatan Jinoyat kodeksining 25,168-moddasining (firibgarlik) 4-qismi “a” bandi va 28, 211-moddasining (pora berish) 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Avvalroq Toshkentning Uchtepa tumanida hokim yordamchisi 30 ming dollari olayotganiga qo‘lga tushgani haqida xabar berilgan edi. Olmazor tumani prokuraturasi tergovchisi 20 ming AQSH dollari miqdorida pora olgan vaqtda ushlangandi.
O‘zbekistonda 2024-yilda jami 6898 nafar shaxs tomonidan 5716 ta korrupsiyaga oid jinoyat sodir etilgan. Jamoatchilik muhokamasiga qo‘yilgan 2025-yilga mo‘ljallangan davlat dasturi loyihasida rahbarlik lavozimidagi 500 kishining korrupsiyaga moyilligini baholash rejalashtirilgan.
Izoh (0)