Osiyo Elit Chempionlar Ligasi 7-turida “Paxtakor” Qatarda “Al-Garafa”ga qarshi bugun, 4-fevral kuni maydonga tushadi.
Bellashuvdan oldin “sherlar” bosh murabbiyi Pedru Moreyra va hujumchi Igor Sergeyev matbuot anjumanida qatnashdi.
“Biz mazkur uchrashuvga tayyorgarlikni yaxshi o‘tkazdik deb o‘ylayman. Bir oy yangi mavsumga hozirlik jarayonida bo‘ldik. Mashg‘ulotlarda imkon qadar ishladik. Bizni mavsumdagi birinchi rasmiy o‘yin kutib turibdi. Raqib esa mavsumining qizg‘in pallasida. Bahs keskin bo‘ladi. Yaxshi o‘yin namoyish qilib, ijobiy natijaga erishishga intilamiz.
Raqibni o‘rganib chiqdik. “Garafa” yaxshi saviyadagi futbolchilarga ega jamoa. Portugaliyalik murabbiy Pedru Martins boshchiligida ular hujumkor futbol ko‘rsatishmoqda. Raqibimiz juda kuchli jamoa”, dedi murabbiy.
Bundan tashqari, Igor Sergeyev ham o‘z fikrlari bilan bo‘lishdi.
“Turkiyadagi yig‘inda bir oy mashq qildik. O‘ylashimcha, jismonan va ruhan o‘yinga tayyormiz. Jamoadagi muhit ajoyib holatda. Ertaga muhim bellashuv bo‘ladi. Biz maydonda borimizni berishga harakat qilamiz. Uyga ijobiy natija bilan qaytishni xohlaymiz.
‘Garafa’ yaxshi shakllangan jamoa, tarkibida ko‘plab xorijlik va mahalliy yuqori saviyali futbolchilar bor. Biz mavsumni endi boshlaymiz. Imkon qadar eng yaxshi o‘yinimizni ko‘rsatishga urinamiz”, dedi Sergeyev.
Ma’lumot uchun, ushbu bahs bugun, 4-fevral kuni Toshkent vaqti bilan 21:00 da boshlanadi. Uchrashuv yangi yildan faoliyatini boshlagan Futbol TV kanalida jonli efirda namoyish etiladi.
Turnir jadvalida “Paxtakor” 4 ochko bilan 9-o‘rinda, “Al-Garafa” esa shuncha ochko bilan 10-o‘rindan joy olgan. Kuchli sakkizlikdan o‘rin olgan jamoalar yakunda pley-offga yo‘llanma oladi.
Izoh (0)