Bugun, 1-fevral kuni Superliga yangi mavsumiga qur’a tashlanadi. Marosim soat 18:00 dan boshlab Futbol TV orqali jonli efirga olib chiqiladi. Qurʼa oldidan PFL jarayon qay tartibda o‘tkazilishi haqida maʼlumot berdi.
-Z45ngl_Q.jpg)
Birinchi navbatda joriy mavsum uchun qabul qilib olingan va hozirga qadar to‘liq tayyor holatga kelmagan stadionlar ro‘yxati bilan tanishtirib o‘tamiz. Ayni vaqtda 11 ta stadion uchrashuvlarni qabul qilishga tayyor. Yana 3 ta stadionda taʼmirlash ishlari davom etayotgan bo‘lib, ular shu yilning aprel oyiga qadar tayyor bo‘lishi ko‘zda tutilgan. Aynan shu jihat qurʼaga o‘z taʼsirini ko‘rsatadi.
Superligaga odatga ko‘ra Berger tizimida qurʼa tashlanadi. Bunda 16 jamoaga tushishi mumkin bo‘lgan har bir raqamning o‘z jufti mavjud va o‘zaro juft raqamlar quyida aks etgan. Shuningdek, musobaqaning ilk turida o‘zaro to‘qnash keladigan raqamlar ko‘rsatilgan.
Maydoni tayyor bo‘lmagan klublardan “Qo‘qon-1912” hamda “Qizilqum” masalasi nisbatan yaqin hududlardagi stadionlar orqali hal etilgan. Biroq mavsumning qolgan qismini Buxoro shahrida davom ettirishi kutilayotgan “Buxoro” va “Mashʼal” klublari ilk turlarni mos ravishda “Paxtakor” va OKMK klublari maydonida o‘tkazishi mumkin.
Shundan kelib chiqib, ular avvaliga “Paxtakor” va OKMK klublari bilan juftlik hosil qilishi, keyinchalik esa o‘zaro juft jamoaga aylanishi lozim. Sir emaski, juft jamoalarni ajratib olish negizida muayyan turda ulardan biri o‘z maydonida, ikkinchisi esa safarda to‘p surishini taʼminlash yotadi. “Buxoro” va “Mashʼal” klublarining bir necha tur davomida boshqa klublar bilan, keyinchalik esa o‘zaro juft bo‘lishida mazkur qoidani o‘zgartirmaydigan faqatgina ikki raqam mavjud: 1 va 8. Shundan kelib chiqib, qurʼaning ilk bosqichida “Buxoro” va “Mashʼal” klublari mazkur ikki raqamdan biriga ega chiqishi taʼminlanadi. O‘z-o‘zidan “Paxtakor” va OKMK mavsum startida ular bilan bir arenadan foydalanishi inobatga olinib, ular mos ravishda 9 hamda 16 raqamlari bilan yuzlashadi.
Anglashilinadiki, dastlabki turda “Mashʼal” va “Buxoro” juftligiga har qanday holatda ham OKMK va Paxtakor juftligi raqib bo‘ladi. Biroq ilk tur aynan qanday ko‘rinishda bo‘lishi qurʼa yordamida aniqlanadi. Shuningdek, “Buxoro” va “Mashʼal” dastlabki turlarni Toshkent hududida o‘tkazishi inobatga olinib, tenglikni taʼminlash maqsadida ular 2-davrada raqiblarini o‘z maydonida qabul qilishi taʼminlanadi hamda ilk turdagi ikki to‘qnashuvda mezbon-mehmon o‘rni almashadi.
Qurʼaning ikkinchi bosqichida yana uch juftlik jamoalari o‘z raqamiga ega chiqishi taʼminlanadi. Yaʼni, “Qo‘qon-1912”, “Qizilqum”, “Sho‘rtan” klublarining stadioni tayyor bo‘lgunicha, ularning mos ravishda Farg‘ona, Samarqand hamda Qarshi shaharlarida to‘p tepishi inobatga olinadi. Mazkur 6 klub uchun raqamlar saralab olingach, qurʼaning uchinchi bosqichiga o‘tiladi.
Suratdan anglashilganidek, juftlik hosil qilmagan qolgan 6 ta klub uchinchi bosqichda o‘z raqamiga ega chiqadi. Bu bosqichda klublar nomi solingan sharchalar allaqachon savatda bo‘ladi. Ikkinchi savatga esa shu vaqtgacha 10 ta klubga nasib qilmagan va ortib qolgan 6 ta raqam alohida ko‘rsatilgan holda joylashtirib chiqiladi.
Maʼlumot uchun, “Qo‘qon-1912”, “Buxoro”, “Mashʼal”, “Qizilqum” kabi klublar qachon o‘z maydoniga qaytishi faqatgina ularning o‘ziga bog‘liq. Agar stadionlar 23-fevral sanasiga qadar Liga tomonidan qabul qilib olinsa, ular mavsumni o‘z uyida ham boshlashi mumkin. Biroq har qanday holatda ham Buxoro va Mashʼal ilk turni mehmonda o‘tkazishi masalasiga o‘zgartirish kiritilmaydi.
Quyida esa 1-davraning to‘liq taqvimi qanday ko‘rinishda bo‘lishi keltirib o‘tilgan. Qurʼadan keyingi haftada Liga uchrashuvlar sanalarini eʼlon qiladi.
Izoh (0)