Toshkentning “Paxtakor” klubi o‘z safiga hujumchi Igor Sergeyevni qo‘shib oldi. Bu haqda klub matbuot xizmati xabar berdi.
“Paxtakor” muxlislariga jonajon jamoamga qaytayotganimni maʼlum qilaman. Muxlislarga eng yaxshilarini tilayman va Yangi yil bilan muborakbod etaman. Yangi mavsumda yuqori natijalar keltirish uchun harakat qilaman”, deydi Sergeyev.
Maʼlumot uchun, Igor uzoq yillar davomida “sherlar” safida harakat qilgan. U klubda jami 180 ta o‘yinda maydonga tushib, 102 ta gol urgan.
Noyabr oyida bungacha Tailandning “Patum Yunayted” klubida faoliyat olib borgan Igor Sergeyev 10 oylik tanaffusdan so‘ng qaydnomaga kiritilgani haqida xabar berilgandi.
Sergeyev yanvar oyida Osiyo Kubogi guruh bosqichi 3-turidan o‘rin olgan O‘zbekiston – Avstraliya bahsida jarohat olgan edi.
Keyinroq u Dohadagi “Aspetar” shifoxonasida muvaffaqiyatli operatsiya qilindi. Futbolchi 6 oy davomida jarohatini davolashi aytilgandi.
Izoh (0)