Ergash Soliyev boshqa ishga o‘tishi munosabati bilan Jizzax viloyati hokimi lavozimidan ozod etildi. Bu haqda Prezident matbuot xizmati xabar berdi.
Ergash Soliyev haqida
Ergash Soliyev 1956-yil Jizzax viloyatida tug‘ilgan. Samarqand davlat universitetini tamomlagan. 2005-yilda “Do‘stlik” ordeni bilan taqdirlangan. Mehnat faoliyatini Toshkent politexnika universitetida assistentlikdan boshlagan.
1997—2000-yillarda Jizzax viloyati davlat mulkini boshqarish va tadbirkorlikni qo‘llab-quvvatlash bo‘limi boshlig‘i, 2000—2012-yillarda Jizzax viloyati Paxtakor tumani hokimi bo‘lgan. 2012-yilda u Jizzax davlat politexnika institutining rektori bo‘lgan. 2016-yildan 2017-yilgacha u Jizzax viloyati Arnasoy tumani hokimi lavozimida ishlagan. U Jizzax viloyatiga 2017-yilning oktyabridan buyon hokimlik qilib kelayotgandi. 2024-yil 5-noyabr kuni Jizzax viloyati hokimi lavozimiga qayta tasdiqlangandi.
Uning o‘rniga Ulug‘bek Mustafoyev Jizzax viloyati hokimi vazifasini bajaruvchi lavozimiga tayinlandi. Tayinlovga qadar u 2019-yil aprelidan buyon “Hududiy elektr tarmoqlari” aksiyadorlik jamiyati boshqaruvi raisi lavozimida ishlab kelgan.
Ulug‘bek Mustafoyev haqida
U 1968-yil Jizzax viloyatida tug‘ilgan. Toshkent xalq xo‘jaligi institutini bitirgan. “Sanoatqurilishbank”ning Jizzax viloyat filialida kichik, keyinchalik katta mutaxassis sifatida ishladi. Keyingi yillarda Markaziy bankning operatsion boshqaruvi katta iqtisodchisi va pul muomalasi bo‘limi boshlig‘i lavozimlarida ishlagan. Keyin 2016-yilgacha Markaziy bank raisining birinchi o‘rinbosari, 2016-yilda Jizzax viloyati hokimining birinchi o‘rinbosari, 2017-yilda “O‘zbekenergo” AJ boshqaruvi raisi lavozimiga tayinlangan.
28-noyabr kuni Erkinjon Turdimov boshqa ishga o‘tishi munosabati bilan Samarqand viloyati hokimi lavozimidan ozod etilgandi.
Izoh (0)