Осиё Элит Чемпионлар Лигаси 7-турида “Пахтакор” Қатарда “Ал-Гарафа”га қарши бугун, 4 февраль куни майдонга тушади.
Беллашувдан олдин “шерлар” бош мураббийи Педру Moreйра ва ҳужумчи Игор Сергеев матбуот анжуманида қатнашди.
“Биз мазкур учрашувга тайёргарликни яхши ўтказдик деб ўйлайман. Бир ой янги мавсумга ҳозирлик жараёнида бўлдик. Машғулотларда имкон қадар ишладик. Бизни мавсумдаги биринчи расмий ўйин кутиб турибди. Рақиб эса мавсумининг қизғин палласида. Баҳс кескин бўлади. Яхши ўйин намойиш қилиб, ижобий натижага эришишга интиламиз.
Рақибни ўрганиб чиқдик. “Гарафа” яхши савиядаги футболчиларга эга жамоа. Португалиялик мураббий Педру Мартинс бошчилигида улар ҳужумкор футбол кўрсатишмоқда. Рақибимиз жуда кучли жамоа”, деди мураббий.
Бундан ташқари, Игор Сергеев ҳам ўз фикрлари билан бўлишди.
“Туркиядаги йиғинда бир ой машқ қилдик. Ўйлашимча, жисмонан ва руҳан ўйинга тайёрмиз. Жамоадаги муҳит ажойиб ҳолатда. Эртага муҳим беллашув бўлади. Биз майдонда боримизни беришга ҳаракат қиламиз. Уйга ижобий натижа билан қайтишни хоҳлаймиз.
ъГарафаъ яхши шаклланган жамоа, таркибида кўплаб хорижлик ва маҳаллий юқори савияли футболчилар бор. Биз мавсумни энди бошлаймиз. Имкон қадар энг яхши ўйинимизни кўрсатишга уринамиз”, деди Сергеев.
Маълумот учун, ушбу баҳс бугун, 4 февраль куни Тошкент вақти билан 21:00 да бошланади. Учрашув янги йилдан фаолиятини бошлаган Futbol TV каналида жонли эфирда намойиш этилади.
Турнир жадвалида “Пахтакор” 4 очко билан 9-ўринда, “Ал-Гарафа” эса шунча очко билан 10-ўриндан жой олган. Кучли саккизликдан ўрин олган жамоалар якунда плей-оффга йўлланма олади.
Изоҳ (0)