Futbol bo‘yicha Osiyo Chempionlar Ligasi guruh bosqichi 6-turida “Paxtakor” “Al-Fayha”ga qarshi bahs olib bordi va 1:4 hisobida mag‘lubiyatga uchradi.
O‘yindan so‘ng “Paxtakor” bosh murabbiyi Maksim Shatskix o‘z fikrlari bilan bo‘lishdi.
Himoyadagi individual xatolar va hujumda vaziyatlardan foydalana olmaslik natijasida mag‘lub bo‘ldik. Juda ko‘p yo‘qotishlar borligi sababli asosiy tarkibga zo‘rg‘a 11 nafar futbolchini yig‘a oldik. Ko‘p o‘yinchilar haqida xulosalar chiqardik. Keyingi rejalarimizda buni inobatga olamiz.
Guruhdan chiqishni maqsad qilgandik, ammo bunga erisha olmadik. Asosiy tarkibdan ko‘pchilik o‘ynay olmadi, zaxirada yosh bolalar o‘tirgandi. Bunday darajada xatolar kechirilmaydi. Individual mahorat va tezlik borasida katta farq bo‘ldi.
Mavsum davomida oldimizga qo‘yilgan asosiy maqsad chempionlik edi va buni uddaladik. Tarkibni kuchaytirishga intilamiz, lekin yaxshi darajada legionerlar topish qiyin. Har doim ham bu borada ijobiy ishlash qiyin. Ularni birinchi navbatda mashg‘ulotdagi umumiy saviyani oshirish uchun taklif etamiz. O‘yinda esa kim ma'lum vaqtda kuchliroq bo‘lsa, o‘sha futbolchi o‘ynashi kerak.
Jarohatlar ko‘pligi tig‘iz taqvim bilan bog‘liq. Chempionlar Ligasida o‘ynagan jamoalar a’zolari juda charchadi, bu jarohatlarga olib keladi. Terma jamoalar nomzodlari tinimsiz mashg‘ulot va o‘yinlarda bo‘lishmoqda. Ular robot emas. Dam olishlari ham kerak. Osiyo Kubogi tufayli dastlab milliy terma a’zolari, keyin Olimpiya termasi vakillari yo‘q bo‘lishadi. Alijonovni “Ahal” bilan safarda sun’iy maydondagi o‘yinda maydonga tushirmadik, chunki bunday maydonda o‘ynash Hojiakbar uchun xavfli. Milliy termada esa uni o‘ynatishdi, endi tizzasida muammo paydo bo‘ldi. Biz o‘z futbolchimizni ayashimiz mumkin, boshqalarni bilmadim.
Maksim Shatskix, “Paxtakor” bosh murabbiyi
Izoh (0)