Superliga 11-turi doirasidagi “Nasaf” — “Paxtakor” o‘yini 15-avgust kuni bo‘lib o‘tadi. Bu haqda PFL matbuot xizmati ma’lum qildi.

Shuningdek, ushbu klublar o‘rtasidagi O‘zbekiston Superkubogi uchrashuvi ham 28-iyul va 2-sentabr oralig‘ida o‘tkazilishi qayd etilgan. Mazkur muddat ichida har ikki klub 9 tadan uchrashuvda ishtirok etadi. Shundan keyin jamoalar Osiyo Chempionlar Ligasidagi ishtirokini boshlaydi.

PFL ikkinchi davra taqvimini aniq belgilashga to‘sqinlik qilayotgan omilga ham to‘xtalgan.

Liga chempionat taqvimini to‘liq shakllantirishga allqachon tayyor. Buning uchun OFK tezroq avgust oyidan start oladigan Chempionlar Ligasi bo‘yicha rejalariga oydinlik kiritib olishi kerak. Sababi musobaqada “Nasaf” va “Paxtakor”dan tashqari “OKMK” hamda “Navbahor” jamoalari ham ishtirok etadi. Liga esa buni inobatga olishi lozim.

Avvalroq “Paxtakor”ning ko‘plab futbolchilari U-20 Jahon chempionatiga jalb qilingani bois Toshkent klubi Superliga doirasidagi “Nasaf”ga qarshi o‘yinni boshqa kunga qoldirishni so‘rab, murojaat qilgani va PFL ushbu so‘rovni qabul qilgani ma’lum qilingandi.