Andijon viloyatining Asaka tumanida erkak 13 yoshli qo‘shni qizga shilqimlik qildi. Bu haqda Bosh prokuratura matbuot xizmati xabar berdi.
Maʼlum qilinishicha, tumanda istiqomat qiluvchi ayol voyaga yetmagan farzandiga nisbatan qo‘shni bo‘lgan er-xotinlar uyatsiz-buzuq harakatlar qilganligi haqida IIOga murojaat qilgan.
Olib borilgan tergovga qadar tekshiruv harakatlari natijasiga ko‘ra, fuqaro A.B. va uning turmush o‘rtog‘i Y.T.larni maʼmuriy javobgarlikka tortish to‘g‘risida qaror qabul qilinib, to‘plangan hujjatlar mazmunan ko‘rish uchun sudga yuborilgan.
Sudning tegishli qarori bilan A.B.ga nisbatan 5 sutka maʼmuriy qamoq jazosi va turmush o‘rtog‘i Y.T.ga nisbatan eng kam oylik ish haqining 2 barobari miqdorida jarima jazosi tayinlangan.
Mazkur sud qaroridan norozi bo‘lib berilgan appelyatsiya shikoyati qanoatlantirilmagan. Hozirda Andijon viloyati prokuraturasi tomonidan mazkur sud hujjatlari o‘rganilmoqda.
Mazkur masala Bosh prokuratura tomonidan nazoratga olingan.
Avvalroq Toshkent viloyati Nurafshon shahrida 60 yoshli erkak 6 yoshli qo‘shnisiga tegajog‘lik qilganlikda ayblanayotgani haqida xabar berilgandi. Shuningdek, Andijonda maktab direktori o‘rinbosari o‘quvchi qizlarga tegajog‘lik qilayotgani aytilgan, Toshkentda metro vagonida notanish qizga tegajog‘lik qilgan erkak besh sutkaga qamalgan edi.
Izoh (0)