Toshkentda metro poyezdida notanish qizga tegajog‘lik qilgan erkak besh sutkaga qamaldi.
Qayd etilishicha, 1-aprel kuni A.N.(erkak) “Chilonzor” metro yo‘nalishidagi elektropoyezd vagoni ichida fuqaro o‘ziga notanish bo‘lgan J.J.ning (qiz bola) belidan past qismini qo‘li bilan ushlab, shahvoniy shilqimlik qilgani aniqlangan.
Sud majlisida so‘ralgan huquqbuzar A.N. o‘zining yuqorida ko‘rsatib o‘tilgan holatdagi aybiga iqrorligini, haqiqatdan ham shu kuni “Chilonzor” metro yo‘nalishidagi elektropoyezd vagoni ichida o‘ziga notanish bo‘lgan fuqaro J.J.ning belidan past qismini qo‘li bilan ushlaganini, hozirda qilmishidan pushaymonligini, bundan keyin bu kabi harakatlarni sodir etmasligini bildirib, suddan unga nisbatan yengillik berishni so‘radi.
Jabrlanuvchi esa sud majlisida huquqbuzarga nisbatan og‘irroq jazo tayinlashni so‘ragan.
Sud hukmiga ko‘ra sudlanuvchi A.N. Ma’muriy javobgarlik to‘g‘risidagi kodeksning 41-1-modda 1-qismida nazarda tutilgan huquqbuzarlikni sodir qilgan deb topilgan va unga nisbatan besh sutka maʼmuriy qamoq jazosi tayinlangan.
Mart boshlarida Toshkent shahrida yo‘nalishli avtobuslardan birida oilali ayolga shahvoniy shilqimlik qilgan konduktor qamalgani to‘g‘risida xabar berilgandi. Undan oldinroq esa Toshkent metrosida notanish qizga shilqimlik qilgan ikki yigit 5 sutkaga qamalgandi.
Izoh (0)