Samarqand viloyati Kattaqo‘rg‘on tumanida qabuliga kelgan ayolga tegajog‘lik qilgan “mulla”ga nisbatan 10 sutka ma’muriy qamoq jazosi tayinlandi. Bu haqda Ichki ishlar vazirligi xabar bermoqda.
Sud hujjatlarida ko‘rsatilishicha, qaynota kelinining sog‘lig‘i yomonlashgani uchun uyga mulla chaqirgan. Kelinni o‘qib qo‘yishini aytgan shaxs uning qaynonasidan xonani tark etishi kerakligini so‘ragan. Ayol bilan yolg‘iz qolgan ushbu shaxs ayolga qo‘l tekkizib, quchoqlab, turli so‘zlar bilan shilqimlik qilgan.
Bundan tashqari, “mulla” ayolga arab tili maktabiga borishi lozimligi, har kuni kechqurun uyidagilarga bildirmagan holda uning uyiga borishi kerakligini aytgan.
Shundan so‘ng ayol bu shaxs ustidan ichki ishlar organlariga shikoyat qilgan. “Mulla” esa organga borishdan bosh tortgan. Sud jarayonida 47 yoshli shaxs aybiga iqror bo‘ldi. Unga nisbatan Ma’muriy javobgarlik to‘g‘risidagi kodeksning tegishli moddalariga asosan 10 sutka ma’muriy qamoq va 600 ming so‘m jarima jazosi tayinlandi.
Ma’lumot uchun, bu shaxs avval ham ichkilik ichib, jamoat joyida tartib buzgani uchun jarimaga tortilgan.
Izoh (0)