Андижон вилоятининг Асака туманида эркак 13 ёшли қўшни қизга шилқимлик қилди. Бу ҳақда Бош прокуратура матбуот хизмати хабар берди.
Маълум қилинишича, туманда истиқомат қилувчи аёл вояга етмаган фарзандига нисбатан қўшни бўлган эр-хотинлар уятсиз-бузуқ ҳаракатлар қилганлиги ҳақида ИИОга мурожаат қилган.
Олиб борилган терговга қадар текширув ҳаракатлари натижасига кўра, фуқаро А.Б. ва унинг турмуш ўртоғи Й.Т.ларни маъмурий жавобгарликка тортиш тўғрисида қарор қабул қилиниб, тўпланган ҳужжатлар мазмунан кўриш учун судга юборилган.
Суднинг тегишли қарори билан А.Б.га нисбатан 5 сутка маъмурий қамоқ жазоси ва турмуш ўртоғи Й.Т.га нисбатан энг кам ойлик иш ҳақининг 2 баробари миқдорида жарима жазоси тайинланган.
Мазкур суд қароридан норози бўлиб берилган аппеляция шикояти қаноатлантирилмаган. Ҳозирда Андижон вилояти прокуратураси томонидан мазкур суд ҳужжатлари ўрганилмоқда.
Мазкур масала Бош прокуратура томонидан назоратга олинган.
Аввалроқ Тошкент вилояти Нурафшон шаҳрида 60 ёшли эркак 6 ёшли қўшнисига тегажоғлик қилганликда айбланаётгани ҳақида хабар берилганди. Шунингдек, Андижонда мактаб директори ўринбосари ўқувчи қизларга тегажоғлик қилаётгани айтилган, Тошкентда метро вагонида нотаниш қизга тегажоғлик қилган эркак беш суткага қамалган эди.
Изоҳ (0)