Toshkent shahrida harakatdagi metro vagoni ichidagi ikki yigit notanish qizga shilqimlik qilib, holatni videoga olgan va internetga yuklagandi. Shundan so‘ng ularning shaxsi aniqlanib, har biriga 5 sutkadan ma’muriy qamoq jazosi berilgan. Holat ijtimoiy tarmoqlarda keng muhokamalarga sabab bo‘ldi. Xususan, bir qator internet foydalanuvchilari jamoat transportidagi tegajog‘lik holatlarini kamaytirish maqsadida metropolitenda faqat ayollarga mo‘ljallangan vagonlar ajratish taklifini berdi.
“Daryo” muxbiri shu munosabat bilan Transport vazirligi hamda “Toshkent metropoliteni” axborot xizmatlari bilan bog‘lanib, ushbu taklif qanchalik o‘rinli ekani, umuman, alohida vagonlar masalasi rejada bor yoki yo‘qligi bo‘yicha izoh oldi.
Transport vazirligi matbuot xizmati rahbari Navro‘z Ashurmatovning aytishicha, hozirgacha tashkilotga bu mavzuga oid hech qanday murojaat kelib tushmagan.
“Bu mazmundagi taklif kelib tushganicha yo‘q. O‘zimizning rejamizdan ham bu masala o‘rin olmagan. Chunki o‘zi harakat tarkibining yetishmovchiligi bor. Shu sababdan qaysidir vagonni alohida qilib qo‘yolmaymiz. Bizning maqsad — harakat tarkibini yetarli darajada ta’minlash”, — deydi Navro‘z Ashurmatov.
“Toshkent metropoliteni” matbuot xizmati rahbari To‘ychi Mirzayev ham shu ma’nodagi gapni aytdi. Unga ko‘ra, asosiy masala — yo‘lovchilar oqimini tartibga solish.
“Bizning qo‘limizdan keladigani — vaqt intervallarini qisqartirib, tirbandlikni kamaytirish. Buni bosqichma-bosqich amalga oshirib kelyapmiz. Bundan tashqari, yangi harakat tarkiblari xarid qilinyapti. Bu o‘z-o‘zidan yo‘lovchilar oqimini tartibga soladi. Alohida vagon qilish rejamizda yo‘q”, — deb aytib o‘tdi To‘ychi Mirzayev.
Avvalroq ijtimoiy tarmoqlarda metroning “Beruniy” bekatidagi kassada ichki ishlar xodimi erkaklar va ayollardan alohida bo‘lib navbatda turishni so‘ragani haqida xabarlar tarqalgandi. Mas’ullarning munosabat bildirishicha, fuqarolardan jinsiga qarab ajralgan holda navbatda turish so‘ralayotgani haqidagi xabar haqiqatga to‘g‘ri kelmaydi.
Izoh (1)
Vagonlarni ajratib qoyish harakat tarkibi yetishmovchiligiga qanday tasiri bor? Mantiqsiz, vagonlarni ajratish nafaqat tegajog’liklarni kamaytirish, balki metrodagi tartibno ham ancha yaxshilaydi. Metro vagonlarini teng yarmini erkaklar uchun teng yarmini ayollar uchun ishlatish maqsadga muvofiq. Bunda shunchaki vagonlarni raqamlash kerak boladi xolos, shunchaki ma’sul shaxslar buni xoxlashsa bo’ldi.