Toshkentda xaridor ayolning tanasidan ushlab, unga tegajog‘lik qilgan mast erkakka jazo tayinlandi.
Sud hujjatlariga ko‘ra, 25-iyun kuni Toshkent shahar Chilonzor tumani Algoritm mavzesi Zargarlik ko‘chasida tarvuz sotuvchisi 33 yoshli U.I. mast holatda o‘ziga notanish bo‘lgan xaridor ayolning belidan past qismi va dumba qismlarini qo‘li bilan ushlab, shahvoniy shilqimlik qilgani aniqlangan.
“UzNews”ning Oliy sud portaliga tayanib yozishicha, sud majlisida so‘ralgan huquqbuzar erkak o‘zining yuqorida ko‘rsatib o‘tilgan holatdagi aybiga iqrorligini, hozirda qilmishidan pushaymonligini, bundan keyin bu kabi harakatlarni sodir etmasligini bildirib, suddan unga nisbatan yengillik berishni so‘ragan.
Sud qarori bilan U.I.ga Ma’muriy javobgarlik to‘g‘risidagi kodeks 41-1-moddasining 1-qismiga (shahvoniy shilqimlik qilish) asosan 5 sutka maʼmuriy qamoq jazosi, 194-modda 1-qismiga (O‘zbekiston Respublikasi Milliy gvardiyasi harbiy xizmatchisining (xodimining) qonuniy talablarini bajarmaslik) asosan esa BHMning 10 baravari miqdorida, yaʼni 3,4 million so‘m jarima jazosi tayinlangan.
Avvalroq Toshkent viloyati Nurafshon shahrida 60 yoshli erkak 6 yoshli qo‘shnisiga tegajog‘lik qilganlikda ayblanayotgani haqida xabar berilgandi. Shuningdek, Andijonda maktab direktori o‘rinbosari o‘quvchi qizlarga tegajog‘lik qilayotgani aytilgan, Toshkentda metro vagonida notanish qizga tegajog‘lik qilgan erkak besh sutkaga qamalgan edi.
Izoh (0)