Samarqandda qabuliga kelgan ayolni quchoqlab, unga shilqimlik qilgan shaxs 10 sutkaga qamalgani haqida xabar berilgan edi. O‘zbekiston musulmonlari idorasi matbuot xizmati ushbu holat yuzasidan munosabat bildirdi.
Ta’kidlanishicha, idora o‘rganish ishlarini olib borgan. Natijada mazkur shaxs Samarqand viloyati Kattaqo‘rg‘on tumanida yashovchi, folbinlik, firibgarlik, ichkilikbozlik kabi dinda qoralangan ishlar bilan shug‘ullanadigan F.H. ismli fuqaro ekani ma’lum bo‘lgan.
Ushbu shaxs hech qanday diniy ma’lumot yoki diniy rutbaga ega emas. Lavhada aytilgan al-Buxoriy nomli madrasa ham O‘zbekiston hududida faoliyat olib bormaydi.
Arab tili kabi biror o‘quv kurslarda o‘qish shaxsga hech qanday diniy faoliyat olib borish uchun asos bo‘lmaydi. Demakki, ushbu shaxsga nisbatan “mulla” so‘zini ishlatish mutlaqo noto‘g‘ri, uning dinga va mullalikka umuman aloqasi yo‘q. Aksincha, u folbinlik, firibgarlik, ichkilikbozlik kabi illatlarga ruju qo‘ygan kimsadir.Ma’lumot o‘rnida, bu shaxs avval ham ichkilik ichib, jamoat joyida tartib buzgani uchun jarimaga tortilgan.Ta’kidlash kerakki, “mulla”, “imom”, “madrasa” kabilar Islom shiorlari hisoblanadi. Alloh taolo islom shiorlarini ulug‘lashga targ‘ib qilish barobarida ularni hurmatsiz qilishdan qattiq qaytargan. Ayniqsa, turli noloyiq ishlarni “mulla”, “imom”, “madrasa” kabi islom shiorlariga bog‘lash esa katta gunohdir.
Xulosa shuki, OAV va ijtimoiy tarmoq yurituvchilari turli voqea-hodisalarni ommani jalb qilish maqsadida din bilan bog‘lab ko‘rsatishdan saqlanishlarini so‘raymiz. Shuningdek, asossiz xabar tarqatish Islom dini ko‘rsatmasiga ko‘ra, katta gunoh, qonunchilikda esa javobgarlikka omil ekanini eslatib o‘tamiz, — deyiladi munosabatda.
Izoh (0)