O‘zbekiston prezidenti yordamchisi Saida Mirziyoyeva o‘z nutqida xotin-qizlar mavzusiga alohida to‘xtalib, oiladagi zo‘ravonlikka qarshi qabul qilingan qonunlar muhimligini taʼkidladi.
“Ayollar huquqlari... Ilgari bu borada gapirish uyat hisoblangan. Biz maishiy va iqtisodiy zo‘ravonlik, shilqimlik haqida sukut saqlaganmiz. Ayollar o‘zini himoya qilish imkoniga ega emasdi. Jamiyat hamma vaziyatda ularni ayblagan. “Uyat!” – bitta javob shu edi. Bugun O‘zbekistonda ham, Qozog‘istonda ham maishiy zo‘ravonlikka qarshi qonunlar qabul qilingan va bu bizning umumiy yutug‘imizdir!”
Saida Mirziyoyeva, shuningdek, Qozog‘iston va O‘zbekistonning yutuqlari ham, muammolari ham umumiy ekani, shu bois ularni hal etishda birgalikdagi saʼy-harakatlar zarurligini taʼkidladi:
“Biroq hali ko‘plab muammolar borki, ularni yolg‘iz hal qila olmaymiz. Qurib borayotgan bitta umumiy dengizimiz, barchamiz uchun umumiy bir havo, bitta Sirdaryo. Oldimizda mintaqaviy xavfsizlikni kuchaytirish, milliy tillarimizni rivojlantirish, milliy o‘zlikni asrab qolish, yolg‘on xabarlar – dezinformatsiyaga qarshi kurash kabi vazifalar turibdi”.
O‘zbekiston prezidenti yordamchisi shunday qo‘shimcha qildi:
“Eng muhim vazifamiz esa taʼlimni rivojlantirishdir. O‘zbekistonda 7 yil avval ham, har yili kuzda maktab va institutlar yopilar edi. O‘qituvchilar, talaba va o‘quvchilar dalaga, paxta terimiga majburiy jalb qilinardi. Butun bir avlod chalasavod bo‘lib qoldi. Biroq biz yuz yillik paxta qulligiga barham berdik! Millionlab o‘quvchilar o‘quv maskanlariga qaytarildi”.
Izoh (0)