АҚШ президенти Дональд Трамп мамлакатнинг жанубий чегараси орқали ноқонуний мигрантларнинг киришини тақиқлаш тўғрисидаги фармонни имзолади. Чегарага қўшимча 1,5 минг аскар ва вертолётлар юборилади. Бу ҳақда Пентагон хабар берди.
Трамп жанубий чегара орқали кириб келган муҳожирларнинг бошпана излаш баҳонаси билан у ерда қолиш ҳуқуқини чеклади. У Ички хавфсизлик вазирлиги, Адлия вазирлиги ва Давлат департаментига АҚШга жанубдан ноқонуний кираётганларни чиқариб юбориш чораларини кўришни топширди.
“Мудофаа вазирлиги жануби-ғарбий чегарани кучайтиради, у ерга қўшимча равишда 1,5 минг ҳарбий хизматчи, шунингдек, аниқлаш ва мониторинг тадбирларини қўллаб-қувватлаш учун экипажлар ва разведка таҳлилчилари бўлган вертолётлар жойлаштирилади”, дейилади Пентагон раҳбари вазифасини бажарувчи Роберт Сейлесс.
У шу тариқа чегарада қуруқликдаги кучларнинг мавжудлиги Трамп лавозимга киришганидан бери 60 фоизга оширилишини айтди.
Пентагон, шунингдек, 5 мингдан ортиқ ноқонуний мигрантларни депортация қилиш учун авиация тақдим этади, уларнинг оқими ва ноқонуний савдосини тўхтатиш учун вақтинчалик ва доимий тўсиқларни қуришда ёрдам кўрсатади.
- The Washington Post газетаси ўз ихтиёридаги ҳужжатга таяниб, Трамп Мексика билан чегарага қўшимча 10 минг ҳарбий хизматчини юбориш ниятида эканини ёзди.
- CNN манбаларга таяниб, АҚШ-Мексика чегарасида миллий гвардиянинг 4,5 минг жангчиси ҳам жойлаштирилганини маълум қилди.
- Трамп 21 январь куни АҚШ жанубий чегарасида фавқулодда ҳолат эълон қилиш тўғрисидаги фармонни имзолаганди. У чегарадаги барча ноқонуний ўтиш жойлари ёпилишини айтган.
Изоҳ (0)