AQSHning saylangan prezidenti Donald Tramp jamoasi 20-yanvar kuni o‘tkaziladigan tantanali marosimdan bir necha soat o‘tgach e’lon qilinadigan “qattiq immigratsion” qonunlar to‘plami ustida ishni yakunlamoqda.
Manbalarga ko‘ra, bu “AQSHda allaqachon istiqomat qilayotgan muhojirlar, shuningdek, AQSH va Meksika chegarasida boshpana izlayotganlarga nisbatan ta’qiblar boshlanishiga olib keladi”. Noqonuniy migrantlarni keng ko‘lamda chiqarib yuborish rejalari megapolislarda immigratsiya va bojxona xizmatlari tekshiruvlarini, Pentagonning qo‘shimcha resurslarini AQSHning janubiy chegarasiga jo‘natishni, mamlakatga kirish uchun yanada qattiqroq cheklovlar joriy etishni o‘z ichiga oladi.
Tramp ilgari bir necha bor inauguratsiyadan keyin Amerika tarixidagi eng katta ko‘lamdagi noqonuniy migrantlarni deportatsiya qilish operatsiyasini o‘tkazishni maqsad qilganini aytgan edi. Shuningdek, dastlabki bosqichlarda mamlakatdan 1 million kishini chiqarib yuborish rejalashtirilgani xabar qilingan.
Migratsiya siyosatini rivojlantirish xalqaro markazi hisoboti mualliflarining baholashicha, AQSHning yangi ma’muriyati tomonidan immigratsiya qoidalarining qattiqlashtirilishi, jumladan mamlakatda noqonuniy yashovchi millionlab odamlarning deportatsiya qilinishi Yevropaga migrantlarning yangi to‘lqiniga sabab bo‘lishi mumkin.
Qayd etilishicha, bunda Yevropa ittifoqi mamlakatlariga ko‘chib boruvchilarning sezilarli qismini Lotin Amerikasi davlatlari fuqarolari tashkil etadi. Hisobot mualliflarining ma’lumotlariga ko‘ra, sayyoraning ushbu qismidan kelganlar allaqachon YIda boshpana so‘rab murojaat qilganlarning umumiy sonida “katta ulushni” tashkil etadi. Shu bilan birga, ularning ko‘pchiligiga hamjamiyatga kirish uchun viza talab qilinmaydi.
Tramp saylovoldi kampaniyasidagi ommaviy deportatsiya haqidagi va’dasini bajarishdan boshqa chorasi yo‘qligini aytgan edi.
“Bizda aslida tanlov yo‘q”, degan Tramp NBC telekanaliga bergan intervyusida.
U Jo Bayden ma’muriyatining “o‘ta yumshoq” siyosati Qo‘shma Shtatlarning uchinchi dunyo davlatiga aylanishiga olib kelganini bir necha bor ta’kidlagan. Tramp o‘z chiqishlarida migrantlarga nisbatan qattiqroq choralar ko‘rish va mavjud migratsiya dasturlarini qayta ko‘rib chiqish zarurligini aytgan.
Izoh (0)