2024-yilda Eronda 997 nafar mahbus qatl etilgan. Bu ko‘rsatkich Eron muxolifati ma’lumotlari asosida tayyorlangan, deb xabar bermoqda Bild nashri.
Huquq himoyachilarining fikricha, o‘lim jazosiga hukm qilinganlarning haqiqiy soni ancha ko‘p, chunki barcha qatllar ro‘yxatga olinmagan.
Maʼlumotlarga ko‘ra, o‘tgan yili Eronda qatl etilganlar soni 2023-yilga nisbatan 16 foizga oshgan.
Qatl etilgan 997 kishidan 34 nafarini ayollar, 9 nafarini esa voyaga yetmaganlar tashkil qilgan.
To‘rt kishi omma oldida qatl qilindi, qolganlari esa qamoqda, deyiladi Bild nashridagi materialda.
3-yanvar kuni Saudiya Arabistonida giyohvand moddalarni mamlakatga olib kirishga uringanlikda ayblangan olti nafar Eron fuqarosi qatl qilingani xabar berilgandi.
Eron Tashqi ishlar vazirligi Saudiya Arabistonining Tehrondagi elchisi Abdulloh bin Saud al-Aneziyni chaqirib, unga sodir etilgan qatllar tufayli “keskin iboralar” bilan norozilik notasini topshirgan. TIV bir necha yillardan buyon mahkumlarga konsullik yordami ko‘rsatish va ularning jazosini kamaytirish bo‘yicha sa’y-harakatlar olib borilganini bildirdi.
Vazirlikning ta’kidlashicha, elchi bilan uchrashuv chog‘ida unga bunday harakatlar ikki davlat o‘rtasidagi huquqiy hamkorlikning umumiy amaliyotiga zid ekani eslatib o‘tilgan.
Bundan tashqari, Eron Tashqi ishlar vazirligining yuridik va konsullik departamenti vakillari masalani yanada tartibga solish uchun Ar-Riyodga borishi kutilmoqda.
Izoh (0)