Eronda 7-avgust kuni mamlakatning kamida 29 fuqarosi qatl qilingan. Bu haqda xalqaro inson huquqlari tashkilotlari bergan xabarlarga asoslanib, Al Arabiya nashri xabar berdi.
Chorshanba kuni 29 nafar mahkum osib o‘ldirish tartibidagi jazoga hukm qilingan. Ulardan 26 nafari qamoqxonada guruh tarzida o‘ldirilgan. Ayrim mutaxassislar o‘ldirilganlar soni eʼlon qilinganidan ancha ko‘p bo‘lganini taxmin qilgan.
Norvegiyada joylashgan “Eron inson huquqlari tashkiloti” qatl holatlari haqida nisbatan batafsil maʼlumot bergan. Unga ko‘ra, ommaviy qatl Tehron tashqarisidagi Karaj shahrida, Gezel Hesar qamoqxonasida amalga oshirilgan.
Osib o‘ldirilgan fuqarolar qotillik, giyohvand moddalar tashish va yetishtirish, zo‘rlash hamda zo‘ravonlikda ayblangan. O‘limga hukm qilinganlar orasida ikki nafar afg‘on fuqarosi ham bo‘lgani aytiladi.
Xalqaro tashkilotlar ommaviy qatllarni to‘xtatish uchun Eronga bosim o‘tkazishga chaqirgan. Eron qamoqxonalarida qancha odam o‘ldirilgani nomaʼlumligi, yaqin haftalarda yana ommaviy qatllar sodir bo‘lishi mumkinligi xabar berilgan.
“Xalqaro hamjamiyat bu holatga zudlik bilan javob bermasa, yaqin oylarda yuzlab odamlar Islom Respublikasining qotillik mashinasi qurboniga aylanishi mumkin”, degan Xalqaro inson huquqlari tashkiloti direktori Mahmud Amiri-Mug‘addam.
Inson huquqlari tashkilotlari Eronda joriy yilda qatl etilganlar soni 345 kishiga yetganini xabar qilgan. Islohotchi Masʼud Pezeshkiyonning mamlakatga prezident bo‘lishi ham bu tizimga hozircha chek qo‘ya olmagan.
Izoh (0)