Bahrayn va Eron hukumatlari o‘zaro siyosiy aloqalarini tiklash maqsadida muzokaralar boshlashga rozilik bildirdi. Bu haqda Al Arabiya nashri xabar berdi.
Manbada aytilishicha, ushbu boradagi kelishuv haqida yakshanba kuni Bahrayn davlat axborot agentligi xabar bergan. Manama va Tehron o‘rtasida ikki tomonlama munosabatlarni tiklashga kelishilgan.
Aloqalarni qayta tashkil etish tadbirlari doirasida Tehronda Bahrayn tashqi ishlar vaziri Abdullatif al-Zayoniy va Eron tashqi ishlar vaziri vazifasini bajaruvchi Ali Bag‘eri Kani uchrashgan. Ikki mamlakat rasmiysi o‘zaro tushunmovchiliklarni yuzaga keltirayotgan ichki va tashqi omillar haqida so‘z yuritgan.
O‘tgan oyda Bahrayn qiroli Hamad bin Iso al-Xalifa mamlakati Eron bilan munosabatlarini yaxshilashni intiqlik bilan kutayotganini maʼlum qilgan edi. Agar kelishuv oshsa, keng ko‘lamli iqtisodiy va madaniy loyihalar ishga tushirilishi aytilgan.
Bahraynning rasmiy axborot agentligi (BNA) xabariga ko‘ra, Moskvada Rossiya prezidenti Valdimir Putin bilan uchrashuv chog‘ida qirol Hamad Bahrayn va Eron o‘rtasidagi diplomatik munosabatlarni tiklash borasida so‘z ochgan. Munosabatlarni normallashtirishni ortga surishdan maʼno yo‘q ekanligini aytgan. Rossiya rahbaridan ikki tomon kelishuvlarida vositachilik qilish so‘ralgan.
Maʼlumot o‘rnida, Bahrayn Eron bilan aloqalarini 2016-yilda uzgan. Mamlakat Tehronni Saudiya Arabistonining ichki ishlariga aralashishda ayblagan.
2016-yil yanvarida Saudiya hukumati taniqli shia rahnamosi Nimr al-Nimrni 2011-yildagi hukumatga qarshi norozilik harakatlarida qatnashishda ayblab, qatl etgan edi. Ushbu holatga nisbatan Eron rasmiylari keskin munosabat bildirib chiqqan.
Izoh (0)