Saudiya Arabistoni qiroli Salmon bin Abdul Aziz Eron prezidenti Ibrohim Raisiyni qirollikka tashrif buyurishga taklif qildi. Bu haqda Bloomberg xabar berdi.
Eron prezidenti taklifni mamnuniyat bilan qabul qilgan.
“Saudiya Arabistoni qiroli prezidentga yo‘llagan maktubida ikki qardosh davlat o‘rtasidagi kelishuvni olqishladi, Raisiyni Ar-Riyodga taklif qildi”, — dedi Eron prezidenti ma’muriyati rahbarining siyosiy masalalar bo‘yicha o‘rinbosari Muhammad Jamshidiy. Siyosatchi Eron rahbari taklifni olqishlaganini qayd etdi.
Ikki davlat 10-mart kuni Xitoy vositachiligida qariyb yetti yil o‘tib aloqalarni tiklash bo‘yicha kelishuv imzolanganini e’lon qildi. 2016-yilda Saudiya Arabistonining taniqli shia voizi Nimr an-Nimr qatl etilishi ortidan eronlik namoyishchilar Saudiya Arabistoni diplomatik missiyalariga hujum qilganidan keyin Ar-Riyod Eron bilan munosabatlarni uzgan.
Bunga javoban qator Eron yetakchilari Ar-Riyodga nisbatan keskin bayonotlar bilan chiqqan. Saudiya Tashqi ishlar vazirligi Eron elchisini chaqirib, unga norozilik bildirgan. 2022-yil sentabr oyida Saudiya Arabistoni valiahd shahzodasi Muhammad bin Salmon Ar-Riyod va Tehron qo‘shnichilik munosabatlariga ega bo‘lishi kerakligini aytgan. Ammo Eronda tartibsizliklar boshlanganidan keyin mamlakat rasmiylari Saudiya Arabistonini namoyishchilarni qo‘llab-quvvatlaganlikda ayblagandi.
Izoh (0)