Germaniya fuqaroligiga ham ega bo‘lgan eronlik Jamshid Sharmahd Eron qamoqxonalaridan birida qatl etildi. Bu haqda Al Jazeera xabar berdi.
Mahkum 28-oktyabr kuni tongda qatl qilingan. Eronda o‘limga hukm odatda osib o‘ldirish orqali amalga oshiriladi. Huquq himoyachilari va ayniqsa Sharmahdning AQSHda yashovchi qizi mahkumni qutqarish uchun oxirigacha kurashgan.
Sharmahdning qarindoshlariga ko‘ra, u so‘nggi bir necha yil mobaynida AQSHda istiqomat qilgan va 2020-yilda Dubayda samolyot almashtirayotgan paytda Eron maxsus xizmati xodimlari tomonidan olib ketilgan. Ikki fuqarolikni tan olmaydigan Eron uni “murakkab operatsiyadan” so‘ng hibsga olganini e’lon qilgan, lekin qanday, qayerda va qachon ushlangani ochiqlanmagan.
Tehron uni Eronda terroristik tashkilot sifatida tan olingan “Tondar” nomli muxolif guruhning yetakchisi deb biladi. Sharmahd 2008-yildagi portlash va Erondagi boshqa hujumlarni rejalashtirishda ayblangan. 2023-yilda “Yer yuzidagi korrupsiya” aybi bilan o‘lim jazosiga hukm qilingan.
“Erkak 2020-yildan beri qamoqda saqlangan va shu vaqt mobaynida o‘zi tanlagan advokatdan foydalanish imkoniyatiga ega bo‘lmagan”, deb ta’kidladi Yevropa ittifoqi.
Bundan tashqari, Eron hukumati Sharmahdning Germaniya fuqaroligi mavjudligiga qaramay, unga konsullik xizmatidan foydalanish imkoniyatini rad etgani aytilgan.
Germaniya munosabati
Germaniya tashqi ishlar vaziri Annalena Berbok qatlni qoraladi. U masalani hal qilish uchun yuqori darajadali guruh Eronga bir necha bor yuborilganini aytdi.
“Jamshid Sharmahdning o‘ldirilishi Tehronda qanday g‘ayriinsoniy rejim hukmronligini yana bir bor ko‘rsatadi: o‘z yoshlariga, o‘z aholisiga va chet el fuqarolariga qarshi o‘limdan foydalanadigan rejim. Biz Tehronga nemis fuqarosining qatl etilishi jiddiy oqibatlarga olib kelishini bir necha marta bildirganmiz”, dedi u.
Aprel oyida Eron Oliy sudi Sharmahdga nisbatan terrorchilikda ayblab chiqarilgan o‘lim hukmini o‘z kuchida qoldirgan.
Izoh (0)