Eron hukumati qamoqdagi Nobel tinchlik mukofoti laureati Nargis Muhammadiyni kasalxonaga yotqizishga ruxsat berdi.
“Ayol qariyb to‘qqiz hafta davomida sog‘lig‘i bilan bog‘liq muammolardan shikoyat qilgan”, deya xabar beradi Associated Press nashri.
Huquq faolining tarafdorlariga ko‘ra, Muhammadiyga bir qancha kasalliklarni kompleks davolash uchun tibbiy ta’til beriladi. Biroq uning kasalxonaga yotqizilishi “bir necha oylik e’tiborsizlik va mahrumlik tufayli yuzaga kelgan” jiddiy muammolarini hal qila olmasligi ma’lum qilingan. Aniqlik kiritilishicha, ayol yurak xastaligidan aziyat chekmoqda va sentyabr oyida berilgan tibbiy xulosaga ko‘ra, asosiy yurak arteriyasi bilan bog‘liq asoratlar kuzatilgan.
Nargis Muhammadiyga 2016-yilda “o‘lim jazosini bekor qilishni targ‘ib qiluvchi inson huquqlari harakati”da ishtirok etgani uchun 16 yillik qamoq jazosi tayinlangan. Faol inson huquqlari uchun kurashni 1990-yillarda boshlagan va jami 13 marta hibsga olingan hamda besh marta qamoq jazosiga hukm qilingan. 2024-yilning yanvarida uning qamoq muddatiga 15 oy, avgust oyida esa siyosiy mahbusning qatl etilishiga norozilik bildirgani uchun yana olti oy qo‘shilgan.
Muhammadiy jazo muddatini Eronning Evin qamoqxonasida o‘tamoqda, u yerda siyosiy mahbuslar va “g‘arb aloqalari” borlar saqlanadi. 2023-yilda u “Eronda ayollarga nisbatan zulmga qarshi kurash va barcha uchun inson huquqlari va erkinliklarini targ‘ib qilishdagi sa’y-harakatlari uchun” tinchlik bo‘yicha Nobel mukofotiga sazovor bo‘lgan.
Izoh (0)