Oklahomada 19-dekabr kuni AQSHning 2024-yildagi so‘nggi qatl etish marosimi amalga oshirildi. Bu haqda NBC News telekanali xabar berdi.
“19-dekabr kuni ertalab Oklahomada AQSHning 2024-yildagi so‘nggi qatl etish marosimi o‘tkazildi: 2006-yilda 10 yoshli qizni o‘ldirgani uchun hukm qilingan oziq-ovqat do‘konining sobiq xodimi qatl etildi”, deyiladi xabarda.
Telekanal ma’lumotlariga ko‘ra, 45 yoshli erkak o‘z tug‘ilgan kunida o‘lim inyeksiyasi orqali qatl etilgan. Avvalroq Oklahoma shtatining Afv etish va muddatidan ilgari shartli ozod qilish bo‘yicha kengashi uning afv etish to‘g‘risidagi iltimosnomasini rad etgandi.
Associated Press agentligi AQSHning Indiana shtati hokimiyati 15 yil ichida ilk bor o‘lim hukmini ijro etgani haqida xabar bergandi. Shtat ma’murlari 2024-yilda qatl etish uchun zarur bo‘lgan pentobarbital dori vositasini qo‘lga kiritishga muvaffaq bo‘lganini aytgan.
O‘lim jazosini bekor qilish tarafdorlari koalitsiyasi AQSH prezidenti Jo Baydenni saylangan prezident Donald Tramp Oq uyga kirgunga qadar o‘lim jazosiga hukm qilingan barcha 40 federal mahbusning jazolarini yumshatishga chaqirgan maktublar yuborgan.
Federal o‘lim jazosini tugatish tarafdori bo‘lgan Bayden prezidentlik davrida moratoriy joriy qildi, Tramp esa federal o‘lim jazosini kengaytirishini aytdi.
Yaqinda o‘tkazilgan Gallup so‘rovi o‘lim jazosini milliy qo‘llab-quvvatlash o‘nlab yillar davomida o‘zining eng past darajasiga tushganini ko‘rsatgan bo‘lsa-da, ko‘p jihatdan amaliyot 2024-yildagi 25 ta qatlning aksariyati amalga oshirilgan bir nechta shtatlarda — Alabama, Missuri, Oklahoma va Texasda pasaymagan.
Izoh (0)