AQShda JetBlue samolyotining shassi qismida ikki kishining jasadi topildi. Jasadlar Florida shtatidagi Fort-Loderdeyl xalqaro aeroportida parvozdan keyingi xavfsizlik tekshiruvi vaqtida aniqlangan.
Bu haqda JetBlue aviakompaniyasi bayonotida ma’lum qilindi.
“Hozircha qurbonlarning shaxsi va ular samolyotga qanday kirib olishgani aniqlanmagan”, deyiladi kompaniya bayonotida.
JetBlue voqeani "dahshatli vaziyat" deb atadi va barcha holatlarga oydinlik kiritish uchun rasmiylar bilan hamkorlik qilishga tayyorligini ta'kidladi.
Newsweek jurnalining aniqlik kiritishicha, hodisa Nyu Yorkdagi Jon Kennedi nomidagi aeroportdan uchayotgan samolyot bilan sodir bo‘lgan.
Bugun 7-yanvar kuni Sankt-Peterburgdan Samarqandga uchgan samolyot Moskvadagi Vnukovo aeroportiga favqulodda qo‘nishni amalga oshirgani xabar berilgandi.
Ma’lum qilinishicha, samolyot Vnukovoga favqulodda qo‘nayotganda yo‘lovchilar va ekipaj a’zolari jabrlanmagan.
So‘nggi bir oy ichidagi samolyotlar bilan bog‘liq hodisalar
25-dekabr kuni Boku—Grozniy marshruti bo‘yicha uchgan samolyot Qozog‘istonning Oqtov shahrida qulagan, oqibatda 38 nafar odam halok bo‘lgandi.
28-dekabr kuni Kanadaning Galifaks aeroportida samolyot qo‘nish chog‘ida yonib ketgani xabar qilingan. Yo‘lovchilarning so‘zlariga ko‘ra, samolyot shassisining g‘ildiraklaridan biri ishlamay qolgan. Galifaks aeroporti samolyot bortidagi barcha yo'lovchilar va ekipaj a'zolari evakuatsiya qilinganini xabar berdi.
29-dekabr, yakshanba kuni mahalliy vaqt bilan soat 9:07 da Jeju Air aviakompaniyasining Boeing 737-800 yo‘lovchi samolyoti Janubiy Koreyada halokatga uchradi. Tailandning Bangkok shahridan Janubiy Koreyaning Muan shahriga uchayotgan samolyot qo‘nish vaqtida uchish-qo‘nish yo‘lagidan chiqib ketgan va panjaraga urilgan, shundan so‘ng u ikki qismga bo‘lingan va yonib ketgan, 177 nafardan ortiq odam halok bo'lgan.
29-dekabr kuni Birlashgan Arab Amirliklarida Jazirah Aviation Club aviakompaniyasiga tegishli yengil motorli samolyot dengizga qulab tushdi. Ma’lum qilinishicha, aviahalokat oqibatida uchuvchi va hamrohi halok bo‘lgan.
4-yanvar kuni Airbus A321 yo‘lovchi samolyoti Misrning Sharm-ash-Shayx shahridagi aeroportga favqulodda qo‘nishga majbur bo‘lgan edi.
Izoh (0)