“Daryo” nashri 26-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya bo‘ylab harbiy tayyorgarlik markazlari ochiladi
Vladimir Putinga Rossiyada Checheniston misolida mamlakat bo‘ylab harbiy tayyorgarlik markazlarini ochish taklif qilindi. Markazlarni ochishni Rossiya bosh vaziri o‘rinbosari, Rossiya prezidentining Uzoq Sharq federal okrugidagi vakolatli vakili Yuriy Trutnev va Rossiya prezidenti ma’muriyati rahbarining birinchi o‘rinbosari Sergey Kiriyenko taklif qilgan.
“Kiriyenko va men Vladimir Putinga yigitlarni tayyorlash uchun shu kabi o‘quv markazlarini yaratish taklifi bilan murojaat qildik. Gudermesda bunday ishlar amalga oshirilgan, u bugungi kunda nafaqat Checheniston, balki Rossiyaning salmoqli qismi uchun ham o‘quv markaziga aylandi. Birgalikda bu ishni davom ettiramiz, boshqa hududlarda markazlar tashkil qilamiz”, — dedi Trutnev.
Unga ko‘ra, markazlar Gudermesdagi Rossiya maxsus kuchlari universiteti asoschilaridan biri Daniil Martinov yordamida yaratiladi.
G‘arb Ukraina masalasida vositachimi yoki provokatormi?
Turkiya prezidenti Rajab Toyyib Erdo‘g‘onning fikricha, G‘arb Rossiya—Ukraina mojarosini hal qilish uchun harakat qilmagan, aksincha, “faqat provokatsiyalar” bilan shug‘ullangan. Uning iddao qilishicha, ziddiyat tomonlari o‘rtasida vositachilik rolini Turkiya zimmasiga olgan.
Erdo‘g‘on ta’kidlashicha, Yevropa Ukrainadan eksport qilinadigan donning 44 foizini olgan. 16 foizi Turkiyaga, 14 foizi Afrika davlatlariga yuborilgan.Turkiya prezidenti, shuningdek, Rossiya bilan birgalikda o‘g‘itlarni eksport qilish bo‘yicha choralar ko‘rishga va’da berdi va bu masala “ishning eng og‘ir qismi” bo‘lishini aytdi.
Urush boshida Rossiya va Ukraina o‘rtasida tinchlik muzokaralari Turkiya vositachiligida o‘tgan, biroq may oyida ular to‘xtatilgandi. Yozda Turkiya va BMT vositachiligida tomonlar Odessa portlaridan Ukraina g‘allasini eksport qilish, shuningdek, Rossiyaning oziq-ovqat va o‘g‘itlarini chetga chiqarish yo‘lidagi to‘siqlarni bartaraf etishni o‘z ichiga olgan don bitimini tuzishga muvaffaq bo‘ldi.
G‘arb davlatlari so‘nggi paytlarda Ukrainaning “adolatli dunyo”ga intilish haqidagi bayonotlarini qo‘llab-quvvatlamoqda. Vladimir Zelenskiy Rossiya qo‘shinlarining Ukraina hududidan 1991-yilgi chegaralar doirasida, jumladan Qrimdan olib chiqib ketilishini talab qilmoqda. Moskva hisoblashicha, Kiyevning yondashuvi uning tinch yo‘l bilan kelishuvga tayyor emasligini ko‘rsatadi.
Hujumchi dronlar Koreyalararo chegaralarni kesib o‘tmoqda
2017-yildan buyon birinchi marta Shimoliy Koreya tomonidan uchirilgan dronlar koreyalararo chegarani kesib o‘tgach, Janubiy Koreya bunga javoban ogohlantirish maqsadida o‘t ochdi. Trevoga bo‘yicha havoga ko‘tarilgan KA-1 yengil hujumchi samolyotlaridan biri halokatga uchradi, deya xabar bermoqda Yonxap.
Agentlik ma’lumotlariga ko‘ra, harbiylar harbiy demarkatsiya chizig‘idan shimol tomondan parvozlarni qayd etgan va uchuvchisiz uchar qurilmalarni aniqlagan. Ularning soniga aniqlik kiritilmayapti. Shimoliy Koreya uchar qurilmalari Kyongido provinsiyasida Kimpxo, Paju tumanlari va Kanxva orolini kesib o‘tgan.
Shunday voqealar fonida Janubiy Koreya Transport vazirligi Kimpxo va Inchxon xalqaro aeroportlariga parvozlarni taxminan bir soatga to‘xtatib qo‘ydi. Bu qaror sabablarini idora ma’lum qilmadi.
Sinxua agentligi ma’lumotlariga ko‘ra, Janubiy Koreya Harbiy-havo kuchlari samolyoti Kanvondo provinsiyasining Xenson okrugiga qulab tushgan. Bortda bo‘lgan ikki uchuvchi katapulta qilib, o‘zlarini qutqarishga muvaffaq bo‘lgan.Jangovar samolyot dala hududiga qulagan, tinch aholi orasidagi qurbonlar haqida ma’lumot berilgani yo‘q.
Rasul Kusherbayevning deputatlik vakolati muddatidan oldin tugatildi
Oliy Majlis Qonunchilik palatasi deputati Rasul Kusherbayevning deputatlik vakolati muddatidan oldin tugatildi. 26-dekabr kuni Markaziy saylov komissiyasining navbatdagi majlisida Kusherbayevning vakolatlarini muddatdan oldin tugatish masalasi ko‘rib chiqildi. Komissiya a’zolari bir ovozdan uning mandatini tugatishni qo‘lladi.
Tadbirkorlar va ishbilarmonlar harakati — O‘zbekiston Liberal demokratik partiyasining a’zosi bo‘lgan Rasul Kusherbayevning deputatlik vakolati uning yozma arizasiga muvofiq muddatidan ilgari tugatildi.
“O‘zbekiston Respublikasi Oliy Majlisi Qonunchilik palatasi deputati va Senati a’zosining maqomi to‘g‘risida”gi O‘zbekiston Respublikasi qonunining 4-moddasiga muvofiq Oliy Majlis Qonunchilik palatasi deputatining vakolati muddatidan oldin tugatilishi uchun deputat “u o‘z vakolatlarini zimmasidan soqit qilish haqida yozma ariza” berish huquqiga ega.
Oliy Majlis Qonunchilik palatasi deputati daxlsizlik huquqiga ega bo‘lib, uning qarorlariga hech bir davlat organi ta’sir o‘tkazish huquqiga ega emas.
Izoh (0)