Ozarbayjon prezidenti Ilhom Aliyev Oqtovdagi aviahalokatda halok bo‘lgan ekipaj a’zolarining oila a’zolari va omon qolgan bort kuzatuvchilari bilan uchrashuvda ushbu fojia uchun Rossiya Federatsiyasi vakillari javobgar ekanini ma’lum qildi.
“Biz adolatni talab qilamiz, aybdorlarni jazolashni va to‘liq shaffoflikni, insoniy munosabatni kutamiz”, dedi Aliyev.
Uning so‘zlariga ko‘ra, hozirda qora qutilar dekodlash jarayonida va yaqinda dastlabki natijalar ma’lum bo‘ladi.
“Men ishonch bilan ayta olamanki, halokatda, Ozarbayjon fuqarolari o‘limida ayb Rossiya Federatsiyasi vakillarida. Yaqin kunlarda biz dastlabki natijani bilamiz va hamma narsa o‘z o‘rniga tushadi, yuz bergan fojianing to‘liq manzarasi oydinlashadi. Bu, albatta, ushbu fojiani to‘liq tergov qilish va aybdorlarni jazolash ishida muhim ahamiyat kasb etadi”, dedi Ozarbayjon prezidenti.
Avvalroq Braziliyada Oqtov yaqinida halokatga uchragan samolyotning qora qutilarini o‘rganish boshlangani xabar qilingan edi.
29-dekabr kuni Rossiya prezidenti Vladimir Putin Ozarbayjonlik hamkasbidan aviahalokat “Rossiya havo hududida yuz bergani uchun” uzr so‘radi. U qurbonlarning oilasiga hamdardlik, omon qolganlarga tezroq sog‘ayib ketishni tiladi.
Qozog‘istondagi aviahalokat
Bokudan Grozniyga J28243 reysini amalga oshirayotgan Embraer 190 samolyoti 25-dekabr kuni ertalab Qozog‘istonning Oqtov shahri yaqinida halokatga uchradi. Dispetcherlar Grozniy va Maxachqal’ada qo‘nishni rad etganidan keyin layner majburiy qo‘nishni amalga oshirishga urindi. Oqtov aeroportiga bir necha kilometr qolganda u qulab tushdi, portlab, yonib ketdi.
Burun qismi to‘liq yongan, dum qismida esa omon qolganlar bo‘lgan. Kamida 29 nafar tirik qolgan yo‘lovchi aynan shu qismda bo‘lgan. Ular kasalxonaga olib ketilgan. Azerbaijan Airlines samolyoti qulashi oqibatida 38 kishi halok bo‘lgan. Qulagan samolyot ko‘zdan kechirilganda teshiklar aniqlangan. Shunga asoslanib, ayrim manbalar samolyotni Chechenistonga dron hujumini qaytargan havo hujumidan mudofaa tizimi o‘qqa tutgan bo‘lishi mumkinligini yozgan.
Izoh (0)