Rossiya Yapon dengizida harbiy-dengiz mashqlarini amalga oshiradi. Bu haqda Rossiya Mudofaa vazirligi tarqatgan xabarga asoslanib, The Moscow Times nashri xabar berdi.
Manbada aytilishicha, Rossiyaning dengiz mashqlari Janubiy Koreya va Yaponiyaga yaqin suvlarda amalga oshiriladi. O‘nlab kemalar ishtirokidagi manyovrlar 10 kun davom etadi.
“Dengizchilar suvosti kemalariga qarshi operatsiyalarni, dengizda kema otryadlarini himoya qilishni, shartli dushmanga tegishli kemalar guruhiga birgalikda raketa zarbalarini berishni, dron va uchuvchisiz hujumlarni qaytarish bo‘yicha mashg‘ulotlarni, amaliy mashg‘ulotlar va jangovar mashqlarni bajaradilar”, — deyilgan Rossiya Mudofaa vazirligi xabarida.
Rossiya Mudofaa vazirligi tomonidan eʼlon qilingan videoda Rossiya Tinch okeani flotining tezkor bazasi bo‘lgan Uzoq Sharqdagi Vladivostok shahridan bir necha harbiy kema va suvosti kemasi dengizga suzib ketayotgani aks etgan.
Mudofaa vazirligi maʼlumotlariga ko‘ra, harbiy-dengiz kuchlarining mashg‘ulotlari Tinch okeani, Yapon dengizi va Oxota dengizida “40 ta kema, korvetlar va yordamchi kemalar”, shuningdek, 20 ga yaqin samolyot va vertolyotlar ishtirokida o‘tkaziladi.
Rossiya muntazam ravishda Uzoq Sharq sohillari yaqinidagi Tinch okeani suvlarida harbiy-dengiz kuchlarining namoyishi sifatida mashg‘ulotlar o‘tkazadi. G‘arb mamlakatlari bu mashqlarni AQSH ittifoqchilarining xavfsizligiga tahdid sifatida muntazam qoralab keladi.
Izoh (0)