Shavkat Mirziyoyev Janubiy Koreyada yo‘lovchi samolyoti halokatga uchrashi oqibatida ko‘plab insonlar halok bo‘lgani munosabati bilan mamlakat prezidenti vazifasini bajaruvchi Choy Sang Mokka ta’ziya maktubi yo‘lladi.
Prezident matbuot kotibining bildirishicha, unda davlat rahbari Koreya xalqiga, marhumlarning oila a’zolari va yaqinlariga chuqur hamdardlik izhor etib, jarohat olganlar tez fursatda sog‘ayib ketishini tiladi.
O‘zbekiston TIV rahbari Baxtiyor Saidov ham aviahalokat munosabati bilan hamdardlik bildirdi.
“Koreya Respublikasining Muan xalqaro aeroportida yuz bergan fojiali samolyot halokatidan chuqur qayg‘udamiz. Tashqi ishlar vazirligi nomidan ushbu dahshatli voqeada halok bo'lganlarning oila a'zolari va yaqinlariga chuqur hamdardlik bildiramiz”, deb yozdi vazir.
Janubiy Koreyadagi aviahalokat
Janubiy Koreyada Jeju Air aviakompaniyasi yo‘lovchi samolyoti 29-dekabr kuni halokatga uchragandi. Shassisi ochilmagan samolyot uchish-qo‘nish yo‘lagidan chiqib ketib, to‘siqqa urilgan va yonib ketgan.
Bangkokdan uchib kelgan Boeing 737 samolyoti bortida 173 nafar Janubiy Koreya va 2 nafar Tailand fuqarosi bo‘lgan.
So‘nggi ma’lumotlarga ko‘ra, hodisa oqibatida 127 kishi halok bo‘lgani tasdiqlangan, ikki kishi omon qolgan.
Bundan bir necha kun avval Bokudan Grozniyga uchayotgan Embraer 190 samolyoti Qozog‘istonda qulab tushgandi. Azerbaijan Airlines samolyoti qulashi oqibatida 38 kishi halok bo‘lgan. Samolyot bortida jami 67 kishi — 62 yo‘lovchi va besh ekipaj a’zosi bo‘lgan. Kamida 29 nafar yo‘lovchi tirik qolgan. Ular samolyotning dum qismida bo‘lgan.
O‘zbekiston prezidenti 25-dekabr kuni samolyot halokatga uchragani munosabati bilan Ozarbayjon va Rossiya prezidentlariga hamdardlik yo‘lladi. Shavkat Mirziyoyev 26-dekabr kuni bo‘lib o‘tgan telefon orqali muloqotda Ilhom Aliyevga aviahalokatda ko‘plab insonlar qurbon bo‘lgani munosabati bilan yana bir marta chuqur hamdardlik bildirdi.
Izoh (1)
“Соболезнования Шавката Мирзиёева лидеру Южной Кореи в связи с авиакатастрофой подчеркивают важность международной солидарности и поддержки в трудные времена. Это отличный пример того, как страны могут проявлять единство и сострадание к друг другу. Надеемся, что такие жесты доброты помогут укрепить дружеские отношения и принесут утешение пострадавшим.”