“Do‘stlar” seriali yulduzi, aktrisa Jennifer Eniston Selena Gomes va Benni Blankoning bo‘lajak to‘y marosimini o‘tkazish bo‘yicha o‘z yordamini taklif qildi. Bu haqda “KinoMail.ru” sayti HeatWorld’ga tayanib xabar bermoqda.
Nashrda qayd etilishicha, Eniston va Gomes ancha vaqtdan beri opa-singildek iliq munosabatda. Gomes va Blankoning unashtirilganidan xabar topgach, Jennifer bo‘lajak kelinni yaqinlashib kelayotgan to‘yi bilan tabrikladi va unga gullar hamda sovg‘a-salomlar yuborib, nikoh marosimini tashkillashtirishda yordam berish taklifini berdi.
“Avvalroq Eniston bir nechta to‘y bazmlarini shaxsan o‘zi tashkillashtirgan, shu sababli aktrisa juda quvonchli, ammo mas’uliyatli ish haqida yetarli tajribaga ega. Shubhasiz, Selena undan kerakli maslahatlarni olishdan xursand bo‘ladi”, deb yozadi insayderlar.
HeatWorld ma’lum qilishicha, xonanda Selena Gomes va prodyuser Benni Blankoning to‘yi Puerto Rikoda bo‘lib o‘tadi, chunki xonandaning qallig‘i o‘sha yerda tug‘ilib o‘sgan. Marosimda kelin-kuyovning yaqin qarindoshlari, do‘stlari, xorijiy yulduzlar, jumladan, Teylor Svift, Bleyk Layvli va Meril Strip kabilar ishtirok etishi rejalashtirilgan.
Avvalroq Selena Gomes o‘zining Instagram sahifasida unashtirilganini e’lon qilgan edi.
Selena o‘zining hamkasbi, musiqiy prodyuser Benni Blanko bilan tanishganiga o‘n yildan oshgan, ammo juftlik rasman birga ekanini 2 yil avval ommaga ma’lum qilgan. Blanko xonandaning eng hit qo‘shiqlariga prodyuserlik qilgan. Jumladan, 2015-yilda Selena va Benni birgalikda “Same Old Love”, 2021-yilda “I Can’t Get Enough” kabi mashhur taronalar ustida ishlagan.
Izoh (0)