Selena Gomes rasman milliarderga aylandi, deb xabar bermoqda Bloomberg. Agentlik hisob-kitoblariga ko‘ra, uning boyligi 1,3 milliard dollarga yetgan, Daromadining katta qismi besh yil oldin ishga tushirilgan Rare Beauty kosmetika kompaniyasiga to‘g‘ri keladi.
Bloomberg Gomesning boshqa daromad manbalarini ham inobatga oldi, jumladan musiqiy albomlar sotuvidan tushgan mablag‘lar, ko‘chmas mulki, striming xizmatlari bilan tuzilgan shartnomalardan olingan daromadlar, brendlar bilan hamkorlik bitimlari, konsertlari va aktrisaligidan olgan gonorarlari. Qo‘shiqchi, shuningdek, ruhiy muammolarga duch kelgan insonlarni qo‘llab-quvvatlash va ruhiy salomatlik sohasidagi tadqiqotlar bilan shug‘ullanuvchi Wondermind startapining ham asoschisidir.
Selena Gomes o‘z faoliyatini 10 yoshida “Barni va do‘stlari” ko‘rsatuvida boshlagan va Disney Channel’ning “Veyverli Pleys sehrgarlari” seriali tufayli mashhur bo‘lgan. Ushbu serialning yangi mavsumi oktyabr oyining oxiriga rejalashtirilgan bo‘lib, unda Gomesning o‘zi ham mehmon sifatida ishtirok etadi. Keyinchalik u musiqa sohasidagi faoliyati va tadbirkorlik bilan shug‘ullangan. Gomes guruh tarkibida ham, yakka ijrochi sifatida ham bir nechta albomlar chiqargan.
Yaqinda Selena Gomes “Bir binodagi qotilliklar” (Only Murders in the Building) serialining to‘rtinchi mavsumida rol ijro etdi. Ushbu serialning allaqachon beshinchi mavsumi suratga olingan. Bundan tashqari, u Linda Ronstadt haqidagi biografik filmda ham suratga tushadi.
Izoh (0)