Qonunchilikka ko‘ra, 2025-yil 1-yanvardan boshlab umumiy ovqatlanish korxonalariga foyda solig‘i stavkasi 50 foizga kamaytiriladi. Bu tartib 2028-yil 1-yanvargacha amalda bo‘ladi.
Shuningdek, umumiy ovqatlanish xizmatlarini ko‘rsatuvchi tadbirkorlarga 2028-yil 1-yanvargacha har oyning 25 sanasiga qadar to‘langan QQSning bir qismini quyidagi miqdorlarda respublika byudjetidan qaytarish tizimi joriy etiladi.
Oylik tovar aylanmasining naqd pulsiz qismi:
- 60 foizdan oshgan umumiy ovqatlanish korxonalariga – byudjetga to‘langan QQSning 40 foizi;
- 60 foizdan kam umumiy ovqatlanish korxonalariga – byudjetga to‘langan QQSning 20 foizi;
- turoperatorlik va mehmonxona xizmatlarini ko‘rsatuvchi tadbirkorlarga – byudjetga to‘langan QQSning 20 foizi.
Avvalroq yanvar-oktyabr oylarida umumiy ovqatlanish faoliyati bilan shug‘ullanuvchi 19 514 ta yuridik shaxs tomonidan 1 trln so‘mdan ortiq soliq to‘langani ma’lum qilingandi. Shundan, 182,9 mlrd so‘mi, yaʼni 16,8 foizi 20 ta korxona hisobiga to‘g‘ri keladi.
Ularning jami tovar aylanmasi 2,7 trln so‘mdan oshgan, qo‘llagan soliq imtiyozlari esa 56,4 mlrd so‘mni tashkil etgan.
Izoh (0)