Toshkent shahridagi “Yunusobod” bozori to‘liq qayta quriladi, u deyarli 5 barobar kengayadi va bir nechta hududlardan iborat zamonaviy savdo, biznes va dam olish markaziga aylanadi. Ularning birinchisi — ekobozor hududi 2025 yil oxirigacha ishga tushiriladi. Bu haqda Toshkent shahri hokimligining munitsipal aktivlarni boshqarish markazi DUK ta'kidlab o‘tdi.
Qurilish davrida bozor o‘z faoliyatini to‘xtatmaydi, barcha tadbirkorlar ishini davom ettiradi. Yangi bozor metro bekatlari, yer usti jamoat transporti bilan uyg‘unlashtiriladi va Yunusobod tumanidagi 360 mingdan ortiq aholi uchun muhim savdo va joziba markaziga aylanadi.
Loyiha turk-singapur loyihachilar jamoasi tomonidan ishlab chiqilgan.
Ular hisobida butun dunyo bo‘ylab qurilgan 125 dan ortiq muvaffaqiyatli savdo-ko‘ngilochar markazlar loyihalari mavjud. Yangi bozor uch qavatli ekobozorga aylanadi. Uning yonida hunarmandlar va zargarlar uchun savdo maydonlari va ko‘ngilochar markazga ega zamonaviy megamoll paydo bo‘ladi. Umumiy maydon 19 ming kvadrat metrdan 94 ming kvadrat metrgacha kengayadi. Hozirgi noqulay, zamon talablariga javob bermaydigan 150 ta mashina sig‘adigan turargoh o‘rniga 1,1 ming mashinaga mo‘ljallangan qulay va xavfsiz avtoturargoh (shundan 650 tasi yer ostida) barpo etilmoqda.
Alohida ta’kidlash joizki, loyihada bozorning hozirgi vazifasini saqlab qolishga alohida e’tibor qaratilgan. Loyihaga ko‘ra, u o‘rtasida atrium va galereyalari bo‘lgan keng, baland zal ichida joylashadi. Bozor tomdagi derazalar orqali tabiiy yorug‘lik oladi. O‘z navbatida, savdo quyidagi hududlarga bo‘linadi: sut mahsulotlari, sabzavotlar, mevalar, go‘sht va baliq bo‘limi hamda boshqalar. Bozorda yuqori sanitariya talablariga javob beradigan omborxonalar, muzlatkichlar, go‘sht tayyorlash sexlari va boshqa xonalar tashkil etiladi.
Tashrif buyuruvchilar uchun kafe va yozgi terrasalar quriladi. Ushbu loyiha hududning iqlim xususiyatlariga moslashtirilgan. Bozorga tashrif buyuruvchilar o‘rtasida so‘rovnoma o‘tkazilgan bo‘lib, unda shaharliklar qishda isitiladigan va yozda sovitiladigan, barcha mavsumda qulay bo‘lgan maydonni hisobga olishni so‘rashgan.
Bozorni qayta qurish jarayonida 350 ga yaqin tadbirkor mehnat qilayotgan bozor faoliyatini saqlab qolish ustuvor vazifa hisoblanadi. Barcha savdo rastalari qurilish ishlari davomida bozor hududidagi belgilangan joyga ko‘chiriladi, bu esa uzluksiz savdo qilish imkonini beradi. Qurilish yakuniga ko‘ra, savdo o‘rinlarining umumiy soni 2000 taga yetkaziladi va tadbirkorlar o‘zaro manfaatli, shartnomaviy asosda xuddi shunday yoki kattaroq maydonlarni ijaraga olish imkoniyatiga ega bo‘ladilar. Toshkent shahar hokimligi tez kunda tadbirkorlar bilan maxsus uchrashuv o‘tkazishni rejalashtirmoqda. Unda ularga yangi shart-sharoitlar tushuntiriladi va ularning istaklari tinglanadi.
Ushbu loyiha qo‘shimcha 4-5 mingta ish o‘rni yaratish imkonini beradi. Buning natijasida “Yunusobod” bozori faoliyatidan budjetga tushumlar sezilarli darajada oshadi.
Izoh (0)