Xalq ta’limi vazirligi 20-dekabr kuni bolalar xavfsizligi hamda turli pul yig‘imlarining oldini olish maqsadida maktablarda Yangi yil bayramini nishonlash bilan bog‘liq ayrim cheklovlar joriy qilinayotganini ma’lum qildi. Oradan ko‘p o‘tmay vazirlik yana rasmiy bayonot bilan chiqib, bayramni nishonlash bilan bog‘liq hech qanday cheklovlar yo‘qligini bildirdi.
Ta’kidlanishicha, Xalq ta’limi vazirligining umumta’lim maktablariga Yangi yil bayramini rejalashtirish va o‘tkazish bilan bog‘liq cheklov yuzasidan tegishli xati noto‘g‘ri talqin qilingan.
“Umumta’lim maktablari hududida Yangi yil bayramini nishonlash bilan bog‘liq hech qanday cheklovlar mavjud emasligini bildiramiz. Shu bilan birga, maktablarda pul yig‘imlari hamda ota-onalarning e’tirozlarining oldini olish maqsadida restoran, kafe va boshqa umumiy ovqatlanish shoxobchalarida maktab o‘quvchilariga Yangi yil bayramini o‘tkazish tavsiya etilmaydi”, — deyiladi bayonotda.
Eslatib o‘tamiz, dekabr boshida Respublika maxsus komissiyasining yig‘ilishida O‘zbekistonda epidemiologik vaziyat barqarorligini saqlab qolish va mamlakat hududiga koronavirus infeksiyasining yangi “omikron” shtammi kirib kelishiga yo‘l qo‘ymaslik maqsadida bir qator yangi tartiblar belgilangandi. Unga ko‘ra, aholi salomatligini ta’minlash hamda O‘zbekistonda epidemiologik vaziyat barqarorligini saqlash maqsadida fuqarolarga yangi 2022-yil bayrami tadbirlarini imkon qadar oila davrasida o‘tkazish tavsiya etilgan.
Izoh (0)